Casonan activo di Covid19 na Aruba y Corsou ta lantando cabez atrobe

ORANJESTAD/WILLEMSTAD – Casonan activo di Covid19 a lanta cabez na tanto Corsou como Aruba. Mas na Corsou, pero Aruba tambe ta mirando un aumento ‘steady’. Pa Aruba ainda segun prome minister Evelyn Wever, e caso no ta alarmante si mira cu hospital su situacion ta ok pero si ta confirma cu casonan a aumenta. “E cifranan cu ta wordo publica ta indica cu Covid ta lantando cabes un biaha mas na Aruba. E cifranan di diaranson ta indica cu tin 111 caso activo di cual 56 ta residente y 55 ta no residente. Esaki ta debi na e variante Delta cu ta percura cu tin un grado di contagio hopi mas halto. E no residentenan no ta solamente turista sino tambe tin varios di nos propio studiantenan cu a bin di exterior pa pasa vakantie y talves no a haña oportunidad pa vacuna y aworaki ta den e cantidad di casonan aki” e mandatario a bisa diahuebs”. Sinembargo e cifranan di awe ta papia diferente idioma caba, unda cu e cantidad di caso activo a bay di 111 pa  130 den un dia (aumento di 21 den un dia, compara cu siman pasa cu tabata 6 pa dia), y unda cu e cantidad di residente y no residente ta igual na 65. 

HOSPITAL TA BASHI, DUS TA OK?

E bon noticia ta, segun e prome mandatario, cu esaki no ta motibo ainda pa alarma pasobra e capacidad na hospital, aunke tin pashent den hospital, ta safe. Un observacion sinembargo cu no tur hende ta comparti. E portal aki a compronde di varios comerciante, cu e pensamento aki no ta corecto. Esaki pasobra ta mustra cu tanten hospital ta bashi, laga hende bira malo numa y no ta necesario pa tuma mas medida. E mandatario ta confirma un biaha mas cu  ‘Ta importante si pa sa cu Covid ta lantando cabes. E aumento di caso ta trece cu ne cu nos mester cuminsa prepara un poco mas pa e dianan nos dilanti”.

HOSPITAL ARUBA

E situacion a cambia den sentido cu na Hospital, debi na e reconstruccion y ampliacion di hospital, pa periodo di por lo menos un aña, hospital lo tin 30 cama menos segun premier Wever a bisa diahuebs durante un conferencia di prensa. Pues aki tambe tin cu tene cuenta cu e situacion ta bou di control, pero mester sigui vigila si.