Doño di trabou no por retira trahado cu no kier vacuna di forma inmediato, pero si por disolve su contracto

WILLEMSTAD – Un doño di trabou no por kita un trahado di forma inmediato, osea ‘op staande voeten’ si e trahado no kier vacuna contra Covid19. Loke si e doño di trabou por haci, ta desolve e contracto di trabou y ofrece e trahado en cuestion un compensacion di retiro, igual na cesantia. Asina un huez a dicta recientemente na Corsou. Un sentencia cu a crea un hurisprudencia interesante cu na Aruba tambe ya caba abogadonan a cuminsa atende cu ne, pa ora cu e caso na Aruba presenta. 

E SITUACION

Na Corsou, e caso di e compania ta cu kier a obliga e trahado di vacuna, sino ta kite for di trabou mesora. E trahado no tabata convenci pa tuma e vacuna pues el a haya su retiro. E trahado na su turno a hiba e compania corte, unda cu ambos partido a haya un sentencia cu mester atende cu ne awor. E esencia di e caso ta cu huez ta haya cu un doño di trabou no por obliga un trahado di vacuna contra Covid19 pasobra e ta viola su derecho fundamental. Ademas, no tin ley cu ta haci vacuna contra Covid19 obligatorio. Di otro banda, un doño di trahado mester por proteha su negoshi contra e malesa y como tal por tuma paso pa sigura esaki. Y vacuna ta un di e medidanan aki y e ora e por ‘viola’ e derecho aki  contal cu e tene cuenta cu cierto aspectonan cu tin cu ‘coregi’ e violacion aki. Entre otro, cu mientras cu no por retira e persona ‘op staande voeten’, cu ta pone cu e trahado ta perde tur cos, e por termina e relacion di trabou di un forma amical y tambe ofrece e trahado un compensacion manera sesantia. Esaki pasobra cu e decision di e trahado di no vacuna, e relacion di trabou cu e doño (cu kier pa e vacuna), ta daña. Por lesa e sentencia original AKI.