Wever: Si casonan sigui aumenta, lo haci tapaboca obligatorio atrobe

ORANJESTAD – Si e aumento di casonan positivo di Covid19 na Aruba sigui asina, un di e prome medidanan cu lo activo ta tapaboca obligatorio tur caminda atrobe. Asina premier Evelyn Wever a bisa diahuebs durante un conferencia. Segun e mandatario, ta preocupa cu e aumento ultimo dianan, aunke cu e situacion na hospital no ta alarmante. Pero un di e prome medidanan cu tin pensa di reactiva si ta necesario, ta pues e uso obligatorio di tapaboca. No ta conoci cuanto e casonan mester aumenta pa e decision aki cay. E mandatario a referi na e 111 casonan positivo cu tabata e conteo te cu ayera. Awe caba esaki a aumenta te na 130. E mandatario a splica cu mientras cu tin un aumento di caso tambe den esnan no residente, no necesariamente ta trata di turista sino tambe hopi studiante cu a contagia cu e virus durante nan bishita na Aruba.