'Turistanan’ venezolano cumprando comestible na Aruba, riba Univision

ORANJESTAD/CARACAS – E fluho di ‘turistanan’ venezolano pa Aruba ultimo tempo, a hala atencion di prensa internacional, te cu e la keda raporta riba e cadena internacional ‘Univision’. E palabra turista ta ‘entre comillas’, pasobra mientras cu e ‘status’ di e venezolanonan aki ta di turista, nan bishita ta netamente pa haci compras den supermercadonan na Aruba y bolbe nan pais yen di mercancia di prome necesidad. Den e raportahe specifico di Univision, ta haci mencion di un cadena grandi, -Superfoods-, cu e ‘turistanan’ ta bishita. Pero esaki no ta kita afo cu tin mas supermercado cu ta haya bishita di e grupo di turista aki. E ta un realidad cu Aruba ta experienciando y cu lo sigui experencia, mientras cu e situacion na Venezuela sigui manera cu e ta. Por lo menos segun e raportahe di Univision, e periodo di carnaval y proximamente Semana Santa, ta un bon oportunidad pa haci esaki.

TEMPO DI BONANZA

E raportahe, ta compara e tempo di ‘bonanza’ na Venezuela unda cu venezolanonan tabata biaha na cantidad pa Aruba y cumpra cosnan grandi y de luho. Tempo cu varios tienda na Aruba tabata enfoca 100% riba e clientela aki. Cu e baymento di e grupo aki, e tiendanan aki tambe a sera mesora. E periodista di Univision, -Elyangelica Gonzales-, ta raporta cu segun su informacion, Superfood su clientela diario ta 35% di turista, di cual 30% ta puro venezolano.

KICO TA CUMPRA

Segun e representante di e cadena di supermercado, -Rudy Richardson- , e venezolanonan ta bin cumpra cierto articulonan manera pampers, hariña pan, y papel di WC. “Y nan ta cumpra nan na gran cantidad, pa por uza 2 pa 3 luna” Richardson ta bisa. Y otro trahado ta bisa cu ora cu e venezolanonan bin, nan ta bay tur practicamente tur cos. Financieramente e ta bon pa e supermercado, pero pa loke ta mercancia, e ta perhudica e clientela local. Richardson ta confirma cu e ta pone un peso extra riba nan, pa nan percura pa por abastece e supermercado mas cu ta posibel. Esey ta conduci na traha overtime pa por keda cla.