Laclé: Gunn y Lopez Tromp no ta integro debi cu no a honra protocol

ORANJESTAD – E guera den partido politico MAS a sigui e siman aki ora cu (awor ex) miembro di partido Solangel Laclé a kibra silencio diaranson riba e problema cu a surgi entre e y e (awor ex) colega di partido sra Gunn. Durante un conferencia di prensa e siman aki, sra Laclé a habri afo riba no solamente sra Aquanette Gunn sino tambe e lider di partido Marisol Lopez Tromp como 'complice'.  Segun Laclé, tanto Gunn como Lopez no a respeta un protocol cu partido a firma dia 6 di mei ultimo cu ta bisa cu esun cu mas voto, ta bay den Parlamento, aunke cu tur sa cu e kiesverordening ta esun cu ta manda aki. Segun Laclé, ora cu el a yama Gunn riba e punto aki, Gunn lo a contesta cu el a actua segun orden y conseho di lider di partido, pues aki tambe Lopez a bira complice. 

PROBLEMA

Segun Laclé, contrario na e ponencia di Gunn (cu manera cu e portal aki a raporta caba den pasado recien) cu tabatin asesinato di caracter contra Gunn door di Laclé, e ultimo aki ta bisa di tin suficiente prueba pa proba lo contrario. Simplemente cu e loke a sosode, segun Laclé, ta prueba cu ni Lopez como lider y Gunn no a actua integro door di a nenga e uso di e protocol firma. Laclé a sigura cu el a subi e partido debi netamente door di e integridad cu Lopez tabata para pe, pa loke a pase (ora cu a sak'e di gobierno) y pa loke e ta(bata) para p’e. Pero awor ta mustra cu cos a cambia y cu ningun di dos ta integro mas. Ademas, Laclé a sigura cu si no ta pa su votonan (el a haya 189 voto y tabata candidato #4), e partido lo no a haya 2 asiento (1 restzetel). E partido a haya total 4681 voto, di cual Lopez a haya 4191, Gunn 77 y Laclé pues 189. Basa riba e kiesdeler, e partido a haya 2 asiento (1 plus 1 restzetel). 

CASO

Mirando cu legalmente e no tin caminda pa cana pa loke ta e protocol vs e ley, e ta bay si cuminsa un caso contra Gunn pa difamacion di caracter, pasobra esaki ta loke cu Gunn a haci den bista di Laclé, siendo cu esaki no tabata necesario. Y aki e ta sigura atrobe cu e tin prueba pa contra aresta tur loke cu Gunn a insinua y bisa den un declaracion recien. Segun Gunn, Laclé a canibalise y a haci yen di cos cu no tabata corecto. Aunke cu legalmente e no por bay contra e kiesverordening, tin loke ta husticia y ley. Ley ta loke ta gana aki, pero no ta husto loke cu Gunn y Lopez a haci, esta di ignora e palabracion firma segun e protocol. Esey ta tur cos. A puntra pa reaccion di Lopez pero no a ricibi esaki ainda.