Premier Wever-Croes na Lampe: No ta pasobra RED a perde eleccion, regla no ta conta p’e
ORANJESTAD - “Mi ta compronde cu colega Lampe no ta gusta cu Ministerraad a overrule e, pero loke e colega aki mester compronde cu no ta pasobra nan a perde eleccion, regla no ta conta p’e “ tabata e prome reaccion di premier Evelyn Wever Croes contra colega minister Rudy Lampe. E reaccion di Wever tabata necesario segun e mandatario despues di -manera sra Wever ta cataloga e- atake feroz contra dje, unda cu den un carta pa Gobernador, a pidi pa pone e ministerio di Enseñansa bou di curatela. Segun Wever, e motibo segun Lampe, ta cu Premier Wever a dicidi di para dos decision recien di Lampe.
E PROME DECISION
E prome ta un decision recien di Lampe pa saca un parti di Scol Reina Beatrix y prop nan den edificio di Scol Paso pa Futuro. Premier Wever-Croes a wordo avisa di e plannan recien di e mudamento aki, door di mayornan y docentenan preocupa y malcontento principalmente pasobra nan no a wordo consulta.
LOPENDE ZAKEN
“Mi a haya mi obliga na tuma e decision aki pasobra e mudamento aki no ta ‘lopende zaken’. E ta un cambio drastico pa ambos scol y ta algo cu e minister demisionario mester laga pa e minister nobo tuma. Henter demas miembro di conseho di minister tabata di acuerdo cu mi y nan a sostene e decision. Pues ta un decision legitimo durante un periodo demisionario”, Prome Minister a duna di conoce.
DI DOS DECISION
E di dos decision cu tambe a bay asina, tabata otro decision hopi recien di Minister Lampe pa diripiente crea un scol MAVO na Colegio Nigel Matthew na San Nicolas, cual ademas lo tin un impacto negativo riba demas scolnan MAVO na San Nicolas. E minister mes a bisa cu tin scarsedad di docente y cu no tin hopi studiante. Pues esey ta haci e decision di crea un MAVO diripiente asina, aun mas ilogico.
LAMPE NO TA GUSTA CU A OVERRULE E
“Mi ta compronde cu colega Lampe no ta gusta cu Ministerraad a overrule e, pero loke e colega aki mester compronde cu no ta pasobra nan a perde eleccion, regla no ta conta p’e. Mi ta percura pa nos Gobierno haci un traspaso debido, cu un ‘overdrachtsdocument’ debido y sin cu nos ta mara e ministernan nobo na decisionnan tuma durante e periodo demisionario. Pa mi integridad y bon gobernacion no ta solamente palabranan. Nan ta forma di traha y biba. Mi a baha gobierno pa motibo di integridad y mi ta determina pa practica e reglanan di bon gobernacion te na final. Esey kiermen cu un minister no por implementa cambionan drastico durante periodo demisionario. Claro cu mi ta lamenta cu colega Lampe ta haciendo esaki. Ta e tin algun dia caba ta purba ataca mi y mancha mi reputacion. Pero mi ta kere cu pa awor tur hende sa ken ta ken”, Premier Wever-Croes a finalisa bisando.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Croes: Ta bay organisa un jobfair pa 45+ y penshonadonan
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
Croes: Aruba mester di 9000 trahado e aña aki pa hotelnan nobo!
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
Figaroa: Proximo gobierno mester consisti di solamente vakministers
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
Minister na Merca ta lobby cu banconan pa fia 160 miyon dollar
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
Wever: Fin di di dos cuartaal 2024, centro di Oranjestad ta haya mas luz
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.
Follow NoticiaCla
