Politiconan dividi riba rapport recien di IMF riba Aruba

ORANJESTAD – Partidonan politico AVP y MEP a reacciona dividi riba e rapport di Fondo Monetario Internacional (IMF) emiti diabierna como resultado preliminar di nan ultimo bishita na Aruba. Pa AVP, IMF ta reafirma e bon trabou cu gobierno ta haciendo, y ta culpa Hulanda y CFT pa cierto parti negativo. MEP ta uza e rapport pa confirma cu Aruba ta sigui den crisis, y a priminti mas reaccion despues. Partido Democracia Real so a prefera di warda te diamars mainta pa duna nan reaccion. “Nos lo haci esaki durante nos conferencia di prensa” Andin Bikker a bisa NoticiaCla.com. Gobierno di su parti mientrastanto a emiti su di dos reaccion oficial (lesa aki), di cual NoticiaCla.com dialuna. E prome reaccion tabata diabierna mes. Y atrobe, manera cu NoticiaCla.com a indica den su raportahe inicial, gobierno a opta pa ilustra solamente e partinan positivo di e rapport, y laga e recomendacionnan y precupacion di IMF afo. E pensamento ta cu diamars mainta awor, durante un conferencia di prensa di gobierno, unda cu premier Eman, hunto cu ministernan de Meza y Bermudez ta invita, por duna mas splicacion riba e puntonan cu nan no ta menciona, fuera di e loke cu nan a informa caba.

REACCION AVP

Pa loke ta AVP, lider di fraccion Rene Herde a reacciona pa NoticiaCla.com bisando cu “e raport di IMF cu a sali siman pasa ta duna un bon bista di unda nos a bin, unda nos ta y unda nos ta bay na Aruba cu nos economia, mercado laboral y finansa publico”. Mescos cu gobierno, Herde ta repasa e puntonan positivo di e instancia financiero, manera IMF ta señala cu Aruba ta sali for di un caida economico di 'dobel cifra' (15%), pa un crecemento economico di 4,5% na 2013 y pronostico di 2,25% na 2015. “ Niun pais, ni den Reino ni pafor di Reino a logra esaki den asina poco tempo. E resultado aki ta danki pa e tremendo crecemento di entradanan di turismo, inversionnan publico di gobierno y un reforma gradual di sector publico” Herde ta sigui bisa. E lider di fraccion ta mustra si cu segun IMF, productividad mester crece sigur awor cu e refineria ta cera. Inversionnan den e sector di energia renovabel ta un sector prometedor pa Aruba segun IMF. E motibo su tras ta cu e lo reduci e gasto grandi cu Aruba tin cu importacion di petroleo. Hunto cu e reformanan fiscal cu ta planea pa e aña aki y reformanan den aparato di gobierno, finansa publico lo sigui consolida te yega te un surplus chikito na 2018.

CULPA HULANDA Y CFT

Herde den su comentario, ta culpa intervencion di gobierno hulandes y consehonan descabeya di CFT, cu inversion y crecemento economico a reduci na 2014.  “ Ta esey y e consehonan di CFT, cu a crea inseguridad, a stagna inversion di sector priva y di gobierno y a stroba economia di crece. Ta tempo pa nos miho amigo Hulanda traha cu nos envez di stroba nos riba tereno di finansa publico.” Y finalmente, segun Herde, e conclusion mas importante cu por saca di e raport di IMF aki ta cu e maneho balansa cu Gabinete Mike Eman I y II a hiba y cu nos fraccion a sostene tabata uno corecto. “ E ta e maneho di prome stimula economia cu proyectonan publico y mehoracion di forsa di compra, di cuminsa crea un sector economico nobo, e economia "berde" di energia renovable, di reduci gastonan publico gradualmente dene forma mas responsabel posibel y di balansa finansa publico cu reformanan fiscal y di reorganisacion structural di aparato publico. “ Nos no ta cla. Ainda falta un bon caminda pa bay. Pero cu nos ta riba e bon caminda ta sigur. E raport di IMF aki ta confirma esaki!” Herde ta sigui bisa den su prome reaccion pa NoticiaCla.com.

REACCION PARTIDO MEP

Partido MEP tabata mas corto den su prome reaccion, indicando cu den curso di siman, e lo bin dilanti cu un reaccion mas extenso. “ Mi prome reaccion riba e IMF press release ta cu nan ta confirma locual cu CFT a conclui (1) cu Aruba ta den crisis ainda, (2) cu Aruba su gobierno mester mustra mas seriedad y mester tuma algun decision hopi doloroso y (3) cu CFT a haya rason na momento di conclui cu situacion financiero di Aruba ta hopi hopi delicado y cu lo tarda hopi tempo prome cu nos yega bek na e nivel di 2009, tempo cu MEP a sali di gobierno” Asina lider di partido MEP, Evelyn Wever Croes ta cuminsa cu su reaccion.” Den curso di e siman aki nos lo elabora mas extenso riba e temanan mas critico di e consehonan di IMF y e solucionnan cu MEP ta propone pa saca Aruba di e crisis cu nos ta aden” Wever ta finalisa bisando.