Gobierno di Aruba a felicita señora Nicole Hoevertsz pa su funcion di Vice Presidente di Comite Olimpico Internacional

ORANJESTAD – Diaranson, despues cu a bira conoci cu Nicole Hoevertsz a keda eligi como un di e 4 Vice Presidentenan di Comitee Olimpico Internacional, felicitacionan a cuminsa drenta di tur skina. Entre nan, gobierno di Aruba a manda su felicitacion publicamente mesora tambe. Prome Minister Evelyn Wever-Croes, den nomber di Gobierno di Aruba y pueblo di Aruba en general, a felicita Nicole pa e logro grandi aki y alabes ta gradici Nicole pa un biaha mas pone e nomber di Aruba na halto internacionalmente. Segun e mandatario,  awe nos por mira un biaha mas un hende muhe determina di nos isla wordo eleva na un posicion halto y importante den e mundo di deporte”.

MINISTER DI DEPORTE

Mientrastanto pa noticiacla, e mandatario responsabel pa deporte, Dangui Oduber tambe a reacciona riba e noticia sumamente positivo. “Como minister di deporte mi kier a felicita sra Nicole Hoevertsz cu e nombracion di vice presidente di comite olimpico (IOC). Esaki sigur ta wordo considera un logro grandi y historico pa un arubiano di un isla asina chikito ocupa un funcion asina importante den e mundo di deportivo. Esaki ta un di e funcionan mas halto den deporte” e mandatario a cuminsa na bisa. “Mi a lesa un articulo caminda Nicole ta referi esaki como un sonjo cu ta bira realidad y un biaha mas ta wordo demostra cu perseverancia, dedicacion y sacrificio tur sonjo por bira realidad. Aruba mester ta orguyoso cu un yui di tera ta bira vice presidente awe di comite olimpico” e mandatario a finalisa bisando.