Tin mas caso positivo activo total di Covid19 pa no residente di Aruba

ORANJESTAD – Aruba su casonan positivo di Covid19 a conoce un aumento di casi triple e ultimo dos simanan aki. Notable ta mes momento cu awor, e cantidad di casonan positivo ta mas hopi cerca esnan no residente, unda te cu awe (diamars) tabatin 55 caso positivo di no residente vs 42 di residente. For di comienso di luna a opta pa no duna cifranan diario mas, y ta duna esaki publicamente solamente un biaha pa siman. Sinembargo ta actualisando e website si diariamente pues for di eynan por sigui e proceso diario toch. Y aki ta nota un aumento considerable di caso. 

AUMENTO

Dia 2 di juli ora cu ainda tabata duna e cifranan diario, Aruba tabatin 28 caso total activo, di cual 16 tabata residente y 12 no residente. E siman despues, e total a subi pa 33 caso total pa e siman di cual 17 tabata residente y 16 no residente. Un siman despues (diabierna ultimo) esaki a aumenta caba pa 60 caso total active di cual 29 tabata residente y 31 no residente. Un cuater dia despues, e cifra di casonan total activo a bula bay di 60 pa 97, faltando 3 pa e yega 100 caso atrobe y cu 42 ta residente y 55 no residente. 

SPLICACION

Den pasado recien Crisis Team a splica e portal aki cu aunke cu no residentenan ta test positivo na Aruba, no ta registra nan como casonan local sino como di afo, debi cu nan a ‘bin cune’ di afor y cu ta simplemente e virus a desaroya durante periodo di incubacion na Aruba. Pues nan no a pega cu e virus akin a Aruba. Y como tal no ta considere como un caso local. Ademas, e periodo cu e persona no residente ta permanece na Aruba ta cay den e periodo di incubacion pues, pesey e no ta afecta e cifranan local. 

VACUNA

Otro punto interesante ta cu di mayoria di esnan registra cu a keda contagia, mayoria tabata esnan cu no a vacuna (85%), mientras cu 15% tabata vacuna. Esey kier men cu toch tin chens pa bo haya e virus, aunke vacuna. Y esey ta nifica cu mester sigui cuida por lo pronto.