Delegacion di Aruba ta completo na Villa Olimpico na Tokio

TOKIO - Desde ayera e delegacion cu ta representa nos isla na Weganan Olimpico Tokyo 2020 ta completo despues di e yegada di e atleta nan di landamento hunto cu nan coach Ismael Santiesteban. Ayera a tuma un momento pa hasi un potret oficial di e delegacion completo p’asina cada uno por tin un recuerdo di Tokyo 2020. Aruba tin tres atleta compitiendo, cu ta Mikel Schreuders, Allyson Ponson y Philip Elhage . Diabierna awor e Weganan Olimpico di Tokyo 2020 ta inicia despues di 1 aña di retraso.

ATLETANAN DI NATACION

Atletanan di natacion Mikel Schreuders y Allyson Ponson a cuminsa nan preparacion na Tokyo mientrastanto. E dos atleta nan di natacion, Mikel y Ally tambe a inicia cu nan entrenamento den e pool Olimpico na Tokyo. Allyson lo ta participando den e 50M free mientras cu Mikel lo ta participando den 2 evento, cual ta 100M free y e 200M free. Tanto Ally y Mikel ta wordo entrena pa coach Ismael Santiesteban. 

 ATLETA DI TIRO

Atleta di tiro Philip Elhage a termina su prome entrenamento na Tokyo. Ayeramerdia (ora di Tokyo) a tuma lugar Philip Elhage su prome entrenamento na Japon, en bista di e Weganan Olimpico Tokyo 2020. Philip lo ta participando na Tokyo 2020 den e 10m pistola di aire. Durante e session di entrenamento a comparti escenario cu e campeon olimpico Jin Jong-Oh di Sur Korea pa cual mester menciona cu e atleta aki tin 5 medaya olimpico den e evento di 50m Pistola (2004, 2012, 2016) y den 10m pistola di aire (London 2012). Awe Philip lo ta continuando cu su entrenando mirando cu diasabra awor 24 di juli su competencia ta tuma lugar. Texto y potret cortesia Comitee Olimpico Arubano.