St Maarten a pone Corsou y otro pais riba lista di riesgo halto

PHILIPSBURG - St. Maarten a disidí ku e lo pone Kòrsou i algun otro pais riba e lista di paisnan di alto riesgo, i konsekuentemente a disidí ku lo pone kondishonnan pa pasaheronan ku ke drenta.

Informashonnan ku EXTRA a risibí for di SMN ta bisa ku, konsiderando e oumento di kasonan di COVID atrobe den diferente pais, i teniendo kuenta ku e vírus i variante dominante Delta ta plamando ku tantu rapides aktualmente den hopi pais i huntu ku esei ta surgi hopi brote, a disidí ku e kondishonnan pa por drenta na St. Maarten ta ser aktualisá i adaptá. I esei ta algu ku a sosodé ayera den oranan di mèrdia.

E kondishonnan di biahe i entrada na St. Maarten lo ser adaptá i aktualisá debí na e kontagio rápido dje variante nobo, i e ta bira lo siguiente:

Kòrsou, British Virgin Islands, Moroko i Oustralia lo ser poné riba e lista di paisnan di alto riesgo, miéntras ku St. Kitts & Nevis lo pasa pa e lista di paisnan di riesgo abou.

Esaki ta nifiká ku tur biahero sin importá e status di nan vakunashon i ku ta bini di paisnan di riesgo haltu ta ser rekerí pa denter di 72 ora promé ku nan salida nan tin den nan posishon un PCR-test negativo. Lo no akseptá ningun tèst antigeno for di e paisnan ku a keda menshoná ariba.

Biaheronan prosedente di Merka i Canada ta ser rekerí pa nan tin komprobante di un PCR-test denter di 72 ora, òf komo alternativa nan lo por hasi un tèst antigeno denter di 48 ora promé ku nan salida.

T’asina ku nasementu di e variante Delta a pone ku hopi situashon den un paisnan a kambia bèk despues ku a de-eskalá. Delta ta un variante ku ta plama hopi lihé i komo tal hopi hende por bira malu pareu. E defensa mas efektivo ku nos komo ser humano tin te awor ta e echo ku hopi di nos a ser vakuná, i komo tal e variante aki no ta pone tantu preshon riba nos sistema di kuido. Aktualmente tin mas ku 91 mil hende aki na Kòrsou ku a vakuná, loke riba su mes ta algu positivo den e sentido ku e variante lo tin di buska hopi pa e topa su víktimanan.

Lástimamente último dianan e kantidat di kasonan di kontagio ta subiendo atrobe, pero prinsipalmente bou di hóbennan, ku ta e grupo ku ta na turno pa vakuná.NOTA: Texto scirbi den Papiamento fonetico di Corsou.