Un morto mas, y tin mas turista activo cu Covid19 compara cu residente aworaki

ORANJESTAD – Aruba a registra despues di basta tempo, un morto mas di Covid19 e siman aki.  Datos colecta durante e siman di 9 pa 15 di juli ta indica cu 41 caso positivo nobo a keda registra di cual 22 ta residente y 19 ta turista. Mester bisa tambe cu manera cu e portal aki a raporta, awe so a raporta 13 caso positivo nobo. Tambe a recupera un total di 15 persona cu ta haci cu awe 16 di juli Aruba tin un total di 60 caso activo di cual 29 ta residente y 31 ta turista. E average di casonan positivo pa dia siman pasa tawata 4 y e siman aki el a subi di 4 pa 6 caso pa dia, y awe tabata 13. Siman pasa nos tawata tin un averahe di 'positivity rate' diario di 6% e siman aki el a aumenta na 7% diario. Tabata tin rumornan ta circula cu lo tin un cantidad di 86 caso di e variante Delta, pero esaki no ta berdad. 

MORTO

Casonan di fayecimento relaciona cu COVID ta aumenta na 108 cu fayecimento di 1 residente mas, condolencia y forsa  na famia di e fayecido.

HOSPITAL

Hospital ta informa cu actualmente tin interna riba piso general di COVID 4 persona y den ICU tin 3 persona.