Aruba a conoce su di dos morto di trafico pa 2021

SAN NICOLAS – Aruba a conoce su di dos morto di trafico pa 2021. Awetardi pa 1:57 pm central di polis  ta wordo notifica di un accidente frontal entre dos auto na altura di Cura Cabay na San Nicolas. Patruya ta despacha cu maximo urgencia pa e sitio di accidente. Na yegada di e sitio polis ta pidi presencia di ambulance cu maximo urgencia. Lamentablemente personal di ambulance no por a haci nada mas pa e chauffer masculino. Pa 3:15pm Dr. Texier ta constata morto di J. Davis , naci na Aruba di 57 aña di edad. Specialista di trafico y polis tecnico a yega na e sitio pa haci nan investigacion. Slachtofferhulp tambe a acudi na e sitio pa brinda sosten na e famianan cu ta involucra den e accidente pisa aki.Noticiacla y Cuerpo Policial Aruba ta manda palabra di profundo condolencia na famia di e fayecido. Un mensahe na tur chauffeur pa bay trankilo den trafico. Bo famia ta warda bo na cas.