Taxista local ta scapa placa cu contrabanda di gasoline di Venezuela

ORANJESTAD - Un taxista local a admiti di ta trece gasoline di contrabanda for di Venezuela a base semanal y ta scapa 30 mil florin pa aña cu e practica aki. E la dicidi di basha abou pa e medio mericano Bloomberg, cu ta basa su mes riba negoshi comercial (lesa e articulo completo aki). E la papia a base di anonimidad, y conta su storia na e periodista cu tabata na Aruba. No ta conoci si e ta e unico of si tin mas ta haciele. Loke ta resalta, ta cu e ta un practica cu parse comun, y cu autoridad di Aruba y Venezuela ta na altura di dje.

CONTRABANDA 

Segun e taxista ‘anonimo’, e ta biaha pa Venezuela (peninsula di Paraguana) por lo menos un biaha pa siman (biahe di 18 miya), y ta bolbe cu 104 gallon di gasoline, contene den varios container chikito, pagando apenas 120 dollar pa biaha. E 3.09 dollar cu e ta scapa, ta aumenta te na 30 mil florin pa aña. Na Venezuela, gasoline ta csta 0.097 bolivar pa liter, osea 1/5 di un cen mericano pa galon, usando e mercado illegal di 186 bolivar pa un dollar. Gasoline na Aruba tabata costa 4.24 dollar pa galon ora cu e storia a wordo raporta.

CONFIRMACION

Pa e storia, e reportero ta papia tambe cu hefe di dept economico Maria Dijkhoff Pita, cu a sigura cu ‘contrabanda di gasoline for di Venezuela tin atencion di gobierno di Aruba’. Tur hende cu trece gasoline di Venezuela via barco, tin cu paga impuesto y usa container cu ta cumpli cu regla. “Nos ta sospecha cu nan ta purba drenta cu algun liter den e tanki di e boto, cu supuestamente ta wordo uza pa e boto pero ta wordo saca despues y poni den container riba tera”. Ademas Dijkhof a declara na e periodista ey cu Aruba ta importa entre 75 pa 80 miyon liter di gasoline pa aña, di cual nada ta for di PDVSA.