Corant Hulandes: Homber sa unda Natalee Holloway ta dera na Aruba

ORANJESTAD – Casi dies aña despues cu e mericano Natalee Holloway a ‘disparce’ na Aruba, tin noticia atrobe di hende cu ‘lo tin informacion unda cu e curpa di Holloway ta dera’. Ta trata di un homber hulandes Jurriën Aunke de Jong (59), cu a declara den e corant hulandes awe Algemeen Dagblad, di su pensamento y kico tur e sa y a haci (wak e storia aki). Fiscal mayor di Aruba Eric Olthof mientrastanto no ta duna e storia aki credibilidad. Sinembargo, e la hala suficiente atencion hulandes cu varios medio hulandes a ‘raporta’ e storia.

PAKICO AWOR

Ta netamente esaki ta e motibo cu de Jong a dicidi di conta su storia. Varios interogacion policial no a conduci na nada segun de Jong, incluyendo ministerio publico. “Husticia ni ta haci nada cu mi declaracion” De Jong a bisa. Segun e homber, Holloway ta dera bou di un vloer di beton di e hotel Marriot Aruba Surf Club (e tempo ey ainda bou di construccion. E ta hopi serca di e hotel unda cu Holloway a keda e tempo ey, esta Holiday Inn. Na 2005 ora cu e caso a presenta, e hotel tabata ainda bou di construccion. De Jong a mustra cu tabatin hopi otro cosnan dudoso tumando lugar na e sitio di construccion e tempo ey, incluyendo asuntonan di droga. Pero riba esey e no kier papia mucho. “Ta e motibo pa cual mi no kier a bisa pa hopi tempo kico mi a wak eynan. Mi lo a trece problema pa mi mes y mi famia” ta sigui declara.

E STORIA

Riba e anochi di 30 di mei 2005, ora cu a mira Holloway pa ultimo biaha, de Jong tambe tabata riba e tereno di construccion. E lo a tende stem y a tende cu e heki di e tereno a wordo habri. E la reconoce e dos personanan como Joran vd Sloot y Natalee Holloway. Segun su re conteo, de Jong a sconde. E la mira con Joran tabata core tras di Natalie. E (Natalie) a yega na un edificio chikito den construccion. E ultimo parti di e trapi ta kibra pues e mester a bay na e otro banda. Loke a sosode eynan no ta sigur. Pero algo mester a bay robes (segun de Jong) pasobra Joran a bolbe cu Natalee den su braza. E ta pone riba vloer. Despues vd Sloot a sconde e curpa bou di e edificio chikito. E la coba un entrada chikito y a pone Natalee eyden. Despues e la tapa e buraco y a bolbe na e heki. De Jong a bolbe Hulanda y no a bisa nada. Esaki pasobra sino e lo mester a duna splicacion di su propio presencia riba e tereno. Ora cu e la tende e declaracion di Peter R de Vries riba e caso, e la dicidi di raporta loke e la wak.

 INVESTIGACION

Mientrastanto de Jong a manda carta na autoridad di Aruba, pasobra husticia no kier a busca na e hotel Marriott. Segun de Jong, e tata di Holloway, esta Dave Holloway conoce e storia aki. Segun fiscal mayor Olthof, na Aruba no tin suficiente capacidad pa controla cada tip. De hecho, riba e declaracion tin ‘varios punto cu no ta cuadra’.