Formador: Proceso pa screen ministernan lo tuma su tempo

ORANJESTAD – E pregunta mas grandi e dianan aki, ta ken ta bira e ministernan pa Gabinete Wever Croes 2. Loke cu noticiacla a compronde cu den e caso aki, e proceso di screening lo tuma su tempo. Manera ta conoci, despues cu keda cla cu e reparticion di carteranan, lo apunta e personanan cu lo wordo proponi como candidato pa bira minister. Pa tanto partido MEP como RAIZ e ta depende kico ta e carteranan cu MEP y RAIZ haña y ken partido ta propone pa bira candidato pa minister y e ora e proposicion lo yega cerca Prome Minister y alabes lider di MEP, como formador.  Despues lo tuma luga e screening di e candidatonan cu a wordo proponi. Esaki lo tuma su tempo. “Mi a yega di haci esaki caba den pasado algun biaha. E no ta un proceso cu bo por rush pasobra e ta un proceso cu mester tuma su tempo pa e ta bon y pa henter Aruba ta sigur cu e proceso di screening a cana su caminda”, formador Evelyn Wever Croes a declara diahuebs mainta.