Actividad local na Corsou ta causa di 23 caso positivo di corona vírus ayera

WILLEMSTAD - Ayera Corsou a keda sorpresa ku un kantidat bastante haltu di kasonan nobo di kontagio di COVID-19 riba nos isla. E Tim di Epidemiologia ta indiká ku esaki lo tin di haber ku un evento lokal. Mas informashon no tin. Ayera for di 1829 resultado di tèst, tabatin 23 kaso di kontagio, di kual sigur 8 tabata kaso importá, i sigur 3 kaso ta kontagiá lokal. Sobra kasonan no ta konosí ainda. Manera ariba indiká, e Tim di Epidemiologia ta investigando posibel klùster di un evento lokal. Tambe posiblemente tin mas ku un klùster. E kasonan aktivo a subi yega te na 67. E situashon na CMC teku ayera mainta ainda tabatin 4 persona hospitalisá, pero ningun tabata risibí kuido intensivo. Ta for di dia 7 di yüli e kasonan di kontagio ta subiendo di 6 pa 10 kaso nobo pa dia. Gran parti di nan tabata kaso importá, miéntras e kasonan lokal tabata varia di 2 pa 3 pa dia. Ayera EXTRA a mustra ku den wikènt tabatin alrededor di 18 kaso nobo di kual 7 tabata kontagio lokal. Ta papia di un evento lokal, i den e kaso aki por pensa riba posibel un of mas fiesta ku lo a tuma lugá.

EXTRA a komprondé ku siman pasa lo tabatin un fiesta den un lokalidat sera, kaminda hopi hóben a asistí. Hasta ta papia ku e fiesta aki lo tabata “sold out”. Gran parti di hóbennan ku lo a bai e fiesta aki, ta hóbennan ku ta pendiente pa sali pa Hulanda pa studia. Nos a komprondé ku tin algun hóben ku no ta bai den grupo di SSC dia 26 di yüli awor, pero riba nan mes, ku lo mester a para nan buelo debí di ta kontagiá ku COVID-19.

Henter e situashon aki, miéntras gobièrnu awe ta hasi 1 (un) luna ku nan a sinta, i te dia di awe niun rueda di prensa pa sigui konsientisá komunidat pa kuida, pasombra COVID-19 no a bandoná Kòrsou ni mundu. Hopi hende ta hasi e pregunta si no tin rueda di prensa riba COVID-19 mas. Sinemabrgo EXTRA a komprondé ku djaweps awor lo tin un rueda di prensa kaminda ku e Tim di Epidemiologia lo bai duna mas informashon tokante sifranan di último dianan. NOTA: Texto traha den papiamento fonologico di Corsou