Minister a duna Colegio San Nicolas ultimatum pa resolve problema

ORANJESTAD – Colegio Arubano San Nicolas a haya un siman di tempo pa resolve e asunto di maestro ausente. Asina minister di enseñansa Michelle Hooyboer a bisa NoticiaCla.com diahuebs anochi como reaccion di e carta di e mayornan disgusta. Segun e mandatario, e tin tur confiansa cu e scol lo cumpli, ya cu nan lo ta trahando riba e asunto aki. Mes momento e ta refuta e acusacion di e comision di mayor si, cu for di 2011 no ta haciendo nada.

KICO A PASA

Manera ta conoci, (lesa e articulo referente aki), mayornan disgusta di alumnonan di Colegio Arubano San Nicolas a anda un carta pa minister di enseñansa pa reclama algun punto. Entre nan ausencia di maestro pa e materia di hulandes. “Tabatin in number di les cu a cancela consecuencia di AO di un maestro. Esey a resulta den cancelacion di su lesnan. Pero esey no ta pa tur les.

SOLUCION

E mandatario a compronde for di Dienst Publieke Scholen (DPS) y e rector di scol, cu e scol tabata ocupa buscando un reemplazante, pero cu tin scarsedad den e nivel di 1e grad. “Mi a duna nan un siman pa bin cu un solucion pa sigura continuidad di e lesnan y pa sigura cu e alumnonan haya un cijfer final tambe na fin di e aña escolar” e mandatario a bisa. E la bisa tambe cu lo mester haci kico cu ta, y hasta si esey nifica, trece un maestro for di Hulanda. “Mester tin un solucion!”.

COMISION MAYOR

Pa loke ta e reclamo di e comision di mayor, cu nan a trece puntonan dilanti for di 2011 y cu nada no a wordo haci, e mandatario a nenga esei. “Mi a sinta cu nan aña pasa y nos ta trahando riba un plan completo pa Colegio San Nicolas. Fase uno a keda aproba caba pa FDA (Fondo Desaroyo Aruba), y ta trahando awor riba e ‘master plan’”. E ta conciente cu e scol a crece e ultimo 3 añanan y lo sigui crece. “Mi ta convenci cu e inversion cu nos lo haci, cu e lo hiba Colegio San Nicolas na e siguiente nivel y prove un fundeshi educacional pa studiantenan cu scohe pa bai Colegio San Nicolas.