AHATA a organisa curso di planificacion di maneho di crisis pa su miembronan

ORANJESTAD -  Aruba Hotel & Tourism Association (AHATA) a organisa un training di maneho di crisis en colaboracion cu Bureau Rampenbestrijding Aruba. E training di dos (2) dia tabata ofreci na miembronan di AHATA y a tuma luga dia 24 y 30 di juni na Aruba Marriott Ballroom.

E meta di e curso aki tabata pa empresarionan mehora nan habilidad pa fungi como un planificado di nan propio ‘Incident Management Team’ y pa desaroya un plan cu ta di acuerdo cu Aruba su sistema nacional di incidente. 

Un plan di maneho di crisis comprensivo ta importante y ta sirbi como un manual pa trata diferente tipo di situacion cu por menasa un compania su entrada y integridad, y menasa siguridad di empleado y clientela. Cu e curso aki AHATA ta proveyendo su miembronan guia y apoyo cu e obhetivo cu companianan por recupera efectivamente di un emergencia.  Tabata tin un participacion activo y amplio durante e curso y tur participante a ricibi nan certificado na final.