Formador Wever: pa fin di siman por tin update riba formacion di gobierno nobo

ORANJESTAD - . “Pa fin di siman aki mi lo mester por duna un update con e trabounan ta bayendo”, Prome Minister, Formador di e siguiente Gabinete a duna di conoce diamars atardi. E ta relata asina riba e proceso di formacion di gobierno. “Gobernador a duna mi 4 siman pa por logra esaki pero mi tin tur confiansa cu nos lo keda cla mas lihe pero nos mester tuma tempo si” Wever Croes a bisa den su declaracion. 

FORMADOR

Manera ta conoci, diabierna siman pasa, Prome Minister Evelyn Wever-Croes a wordo nombra un biaha mas e formador pa e gobierno nobo door di Gobernador di Aruba, señor Alfonso Boekhoudt. E trabounan a cuminsa caba. Prome Minister a indica cu e trabounan di formacion ta bay ta varios; un ta pa yega na un acuerdo di coalicion y gobernacion den liñanan grandi. Esaki awo ta den proceso.  

REPARTICION DI CARTERA 

E reparticion di carteranan y ministerionan tambe ta algo cu lo mester cuminsa traha riba dje den e proximo dianan nos dilanti. Un parti hopi importante ta e screening pa cu e ministerionan cu tambe tin cu cuminsa ainda. Banda di e trabounan interno di e formacion tin tambe e trabounan di reuni cu stakeholders manera ta custumber di tur formador. Prome Minister a haci esaki tambe na 2017 y lo reuni cu stakeholders pa gobernacion 2021-2025 tambe. Prome Minister a indica cu ta trahando riba e schedule pa wak cua ta tur e instancianan y deparatmentonan cu mester reuni cu nan y lo cuminsa reuni den curso di e siman aki. 

DEN PROGRESO

Trabounan pa forma e siguiente Gabinete ta den progreso e mandatario a bolbe bisa. “Mi no sa con lihe nos por keda cla. Ta aworaki nos a cuminsa y mi no a invita niun stakeholder ainda y tampoco mi a haci niun peticion ainda pa screening. Nos no a yega ainda na reparticion di carteranan ni apuntamento di ken ta bira minister. Nos ta na comienso ainda” e formador a finalisa bisando.