Awe Xander Bogaerts ta den lineup inicial di All Star Game di MLB

DENVER – Pa di 3 biaha di su carera, e pelotero professional Arubano Xander Bogaerts ta participa den e All Star Game di Major League Baseball awe y pa di 2 biaha e ta den e lineup  inicial como bateador # 3. Esey ta mustra su popularidad si mira cu ta via votamento popular cada hungador ta logra drenta y participa. E hecho cu e ta inicia e wega, no ta nifica cu e lo keda den e wega completo, pasobra ta custumber cu ta cambia hungadornan pa asina mayoria hungador eligi haya chens pa participa tambe. Un otro punto interesante di e wega ta cu e pitcher pa American League, Ohtani Shohei no solamente ta pitcha sino tambe bati y ta habri e lineup como e prome bateador pa liga Americana. Ta masha poco esaki ta sosode na Merca.