Mayornan disgusta a manda carta pa minister riba Colegio San Nicolas

SAN NICOLAS - Mayornan di alumnonan di Colegio Arubano San Nicolas a manda un carta awe pa minister di enseñansa Michelle Hooyboer Winklaar, pa protesta pa un number di asunto. Segun e mayornan, for di 2011 nan ta reclamando riba varios problema, pero no ta hayando oido. Den e carta, ta raporta varios punto specifico y a demanda atencion di e mandatario, prome cu nan sigui cu siguiente paso, aunke no ta duna indicacion ki paso esakinan lo ta. For di maestronan AO, te na maestronan inferior y falta di material, e carta ta yen di keho dirigi na e mandatario .

CARTA

Den e carta di 3 pagina, e presidente di e comision di mayor COMMA, Gaye Dorff ta bisa entre otro cu tin problema cu e idioma hulandes ya cu for di comienso di e aña aki, e maestro en cuestion ta AO. Esaki ta nifica cu nan no ta hayando les den e materia aki, cu consecuencia cu nan lo por keda perhudica. Tambe nan ta cuestiona e hecho cu tin intencion di atrae maestronan pensiona pa e proximo aña escolar, y cu esey no ta corecto pasobra e maestronan lo ‘no tin interes di e studiantenan na pecho, no ta motiva y ta dehado”.

KEHONAN

Tambe nan ta mustra riba e hecho cu e scol su estado ta deteriorando y cu falta hopi material esencial pa duna les. Material cu nan mester pero cu simplemente no tey. Tambe e scol no ta den un estado apto y tur esaki ta perhudicando e muchanan. Falta di atencion pa e scol, problema cu droga, sierre reciente di Arubanita, ta motibonan di desgusto di e mayornan. Nan ta pidi atencion urgente di e mandatario y ta spera cu por logra esaki tambe.

BISHITA MIKE EMAN

Tabata luna pasa ainda cu prome minister Mike Eman a bishita e scol aki, y a mustra su aprobacion pa loke e scol ta haciendo riba tereno di sostenibilidad. Riba 22 di januari ultimo c Prome Minister Eman a ricibi un recorido di e scol, cu a independisa su mes di Colegio Arubano na 2012. Pa e mandatario tabata masha interesante mira con hobennan ta dedica na mes na e sistema di sostenibilidad. Nan ta uza awa di airco pa muha matanan cu nan ta planta y for di cual nan ta cosecha pa nan mes come despues. E ta algo cu apenas a cuminsa na october ultimo, pero ta hayando acogida cerca e studiantenan di Colegio San Nicolas, kendenan a splica e mandatario con e proyecto a cuminsa. Durante e recorido y reportahe aki sinembargo, no a bisa nada di e problemanan aki. Minister di enseñansa a priminti NoticiaCla.com un reaccion pero ainda no a logra duna esaki.NOTA: foto di archivo di un bishita di prome minister Eman na e scol, na januari ultimo.