Variante Delta ta aumentando y menasando na Aruba

ORANJESTAD – E variante Delta di Covid19 (conoci como e variante di India of B.1.617.2) ta menasando na Aruba y ta aumentando den cantidad. Asina e miembro di Crisis Team Sharline Koolman a informa durante un conferencia di prensa dialuna mainta. Den apenas algun siman esaki a aumenta di 0% di presencia te na 32% di ta presente den nos comunidad. Y mirando e forma con comunidad a comporta su mes (malo) den e ultimo fin di siman aki, Koolman no ta descarta un aumento  di contagio di Covid19 debi na e variante Delta cu ta mas contagiable cu tur otro variante. 

E AUMENTO

Segun Koolman, den e siman di 20 pa 26 di juni ultimo, no tabatin ningun caso di Delta presente. Den e siman di 27 di juni pa 3 di juli, tabatin 3 caso den 16 prueba, cu ta un total di 19%. Sinembargo den e siman di 4 di juli pa 11 di juli, a tuma 25 prueba di cual 8 a test positivo pa Delta cu ta un 32% di caso. Esaki ta un situacion fastioso y no ta descarta un aumento den e simannan cu ta bin.