Drag race y Palo Marga ta keda contribui na turismo di Aruba

ORANJESTAD - Siman pasa Lucho Werleman di The Boss Racing Foundation a topa cu un otro turista cu ta encanta cu Aruba y tambe drag racing aki na Aruba. Ta trata aki di Sr. Eric Lackenbauer di Massapequa, New York. Eric na Merca ta core un Ford Mustang den e categoria Outlaw 8.5 y tin un mihor tempo di 4.98 na 141.65 MPH den e 1/8th mile. Durante e ultimo 5 añanan Eric a bin Aruba 7 biaha di cual 3 tabata pa wak The Boss Drag War y 2 biaha pa One Cool Summer Nationals, tanto e como su casa Jessica ta hopi encanta cu Aruba y Palo Marga. Despues cu Eric a propone na Jessica riba Sonesta Island na 2011, na July di 2012 nan a drenta enlace matrimonial y nan a dicidi cu nan honeymoon nan lo bin pase na Aruba y e la conta Lucho cu the best thing cu por a pasa cu nan ta di bin pasa nan Honeymoon na Aruba y por a bai Palo Marga pa asina nan disfruta di caredanan di drag race.

Eric su tremendo storianan di Aruba a pone tambe cu na luna di Augustus venidero un otro amigo di dje cu lo bin Aruba pa asina drenta enlace matrimonial riba beach na Marriott. Eric su pasion di Drag race e ta compartiele na Merca mayoria biaha cu su Tata cu ta companjele pa mayoria di e eventonan di drag unda e ta participa. Eric y su Ford Mustang a aparece den diferente revistanan na Merca incluyendo S-K Speed Racing Equipment, Stang Magazine y Muscle Mustangs y ki ora e hanja un chens e ta conta over di su tremendo experencianan cu e ta pasa na Aruba y con bon e hendenan di Aruba ta trata e bishitantenan y sin laga afor cu tin un pista di Drag Race cu jama Palo Marga.

Diamars den oranan di merdia Eric y su casa a bandona nos isla pero ya nan a book nan proximo bishita pa nos isla y e biaha aki nan lo ta biniendo bek den luna di Juni cu henter nan famia. Aki na Aruba Eric tin bon contacto tambe cu Sr. Roland Thijzen di Mustang Club di Aruba y awor conhuntamente cu Lucho Werleman di Palo Marga lo bai cuminsa traha riba un evento special pa e bishita di e famia completo di Eric Lackenbauer na e luna di Juni pa asina nan por sinti nan mes na cas pero tambe por haña mas cosnan bon pa bai conta nan conocirnan na Merca tocante di nos dushi isla di Aruba. Mescos cu Eric tur siman tin un of mas turista cu ta yega na e pista di Palo Marga pa asina wak personalmente e facilidadnan y puntra pa e schedule di careda pa asina nan por plania nan proximo bishita na nos isla. Palo Marga ta miembro di International Hot Rod Association (IHRA) y tur aña danki na e trabao voluntario di Juancho Werleman y su partnernan local ta regala na e IHRA World Champion un paid vacation na Aruba, pues di e forma ey henter aña Aruba ta keda haña promocion atravez di IHRA su website y su magazine Drag Review y esaki a juda grandemente cu nos ta hanjando tur aña mas y mas amantenan di Drag Race cu ta bishita nos isla no solamente for di Corsow y Venezuela ora tin caredanan international pero awor tambe for di otro destinacionnan cu tambe ta gusta drag manera Merca y Puerto Rico.