Tjon: E situacion na Aruba ta uno bastante alarmante

ORANJESTAD – E fin di siman aki polis lo ta mucho mas visible riba caminda, principalmente na San Nicolas y Oranjestad segun alto comisario di polis Vanessa Tjon-Kock. Segun e alto comisario, e situacion na Aruba ta uno ‘bastante alarmante’ cu tin atencion di polis. E ta referi na e cantidad di caso di asesinato y tiramento cu tabatin ultimo tempo, primordialmente den e districto di San Nicolas. Loke ta hala atencion tambe ta e edad hoben di tanto e victimanan y esnan responsabel pa e actonan aki, cu ta hobenan di edad entre 15 pa 22 aña di edad segun Tjon-Kock. Como tal lo tin extra control pa asina evita cu e situacion por bay for di man.