E intento di formacion firma, ta conta 6 punto di principio entre MEP y RAIZ

ORANJESTAD – Usando 6 punto di enfoke, partidonan MEP y RAIZ a firma un intento di formacion di gobierno diahuebs anochi. E temanan cu a keda trata ta integridad, acuerdo cu Hulanda, recuperacion economico, finansas publico,  desaroyo sostenibel  y asuntonan social. Cada uno a keda elabora ariba y awor e trabounan ta cuminsa pa loke ta formacion mes. Aki ta unda cu programa di gobernacion mes lo wordo atendi den detayes. 

INTEGRIDAD

Entre e puntonan, partidonan a haya otro riba e tema aki unda cu ta sinti cu democracia di nos pais y bon gobernacion ta depende di e capacidad y in- tegridad di esnan cu ta ocupa posicionnan clave den e aparato (semi) gubernamental. P’esey ta importante pa garantisa gobernantenan integro den gobernacion y procesonan integro den e aparato gubernamental y companianan estatal. Ta sigui eleva “integridad” na nivel ministerial dunando contenido na Bureau Integriteit, Defensor di Pueblo y Corporate Governance Code pa companianan estatal a base di un “integriteitsbeleidsplan”. Ademas ta busca ratificacion di e Convencion di Nacionnan Uni contra corupcion di 2003.

ACUERDONAN CU HULANDA

E acuerdonan cu a wordo cera cu Hulanda a base di “landspakket” ta wordo respeta y lo delibera cu Hulanda pa un optimo implementacion na bie- nestar di nos comunidad.

RECUPERACION ECONOMICO

Un gobierno pro-activo pa rebiba economia cu e tarea principal di facilita inversion y produccion den sector priva den consulta y coordinacion cu dicho sector. E Masterplan “Repositioning our Sails: Aruba’s mission driven model for eco\nomic recovery & resilience” lo ta fundeshi pa futuro desaroyo y pa por diversifica nos econo- mia conhuntamente cu sector priva y publico. Enfasis lo ta un economia di calidad en bes di cantidad.

FINANSAS PUBLICO BALANSA

Ta sigui baha gastonan innecesario y nos debe nacional na un nivel manehabel, restructura e sistema di impuesto pa uno mas simpel y reforma e peso di impuesto di directo pa indirecto. Ta sigui cu e proyecto di “begrotingskamer”.

DESAROYO SOSTENIBEL Y MEDIO AMBIENTE

 Ta papia di proteccion di nos medio ambiente, crea mas oportunidad pa agricultura y un economia circular pa sigui duna contenido na e Metanan Mundial di Desaroyo Sostenibel

DERECHONAN SOCIAL, CUIDO DI ADULTO MAYOR, NOS MUCHA Y HOBENNAN

Den e proximo cuatro añanan, e empeño maximo di e gobernacion lo ta pa proteha e comunidad por medio di husticia social, pa hisa e nivel di siguridad, bienestar y calidad di bida, promove salud en general y salud mental en especial, pa na final contribui na un Aruba sigur, resiliente y duradero na unda ser humano lo keda central. Desaroya un maneho integral, duradero y sostenibel pa nos adulto mayor, brindando nan participacion optimal den nos comunidad. Lo pone mas enfasis riba e guia di nos hubentud, pa asina nos por brinda nos muchanan y hobennan mas perspectiva den bida riba tereno di enseñansa, deporte y cultura. Esaki lo yuda nan maneha factornan cu por hiba nan den mal caminda como tambe problemanan den famia na tempo y efectivamente.

FORMADOR

Te aki e temanan cu ta poni den e acuerdo cu a keda firma diahuebs anochi. A priminti cu lo traha duro, incluyendo fin di siman pa asina por keda cla cu esaki mas liher cu ta possible. Oficialmente no a nombra un formador ainda y ta en espera di esaki aunke aworaki, mirando e desaroyo, esaki ta parce di ta meramente un formalidad.