Partido MEP y RAIZ a firma nan declaracion di intento pa forma e proximo coalicion

ORANJESTAD - Lidernan di partido MEP y RAIZ diahuebs anochi, Evelyn Wever Croes y Ursell Arends respectivamente a firma e declaracion di intento pa formacion di gobierno 2021-2025 na e Lighthouse, esta e Farro Blanco na West Punt.  A scohe e sitio como un lugar simbolico pa marca e futuro nobo manera cu e dos partidonan lo traha hunto. Segun lider di partido MEP Evelyn Wever Croes, tabata nan cu a tuma e iniciativa pa acerca RAIZ dos dia pasa pa wak si nan tin e boluntad pa traha hunto. Segun Wever a declara algun dia pasa caba, nan ta buscando partidonan serio y stabil cu cual nan por logra forma un coalicion pa e proximo 4 anjanan. Y mirando cu RAIZ su programa ta hopi similar, a bay di acuerdo y diahuebs a firma e intento. Awor ta bay traha riba e acuerdo di gobernacion y ta spera cu dentro di poco nan lo por presenta un acuerdo cu e ora por papia di formacion di gobierno. Oficialmente no a nombra un formador, pero segun Wever, esaki ta cuestion di dias pa sosode. Mientrastanto nan lo traha tur dia incluyendo fin di siman pa keda cla mas lihe cu ta posibel. Hopi detaye no tabata conoci pero por a compronde cu tin por lo menos 6 pa 7 punto den e intento di acuerdo cu ta uni nan y cu nan lo traha ariba pa formula nan programa di gobernacion. Partido MEP a logra 9 asiento y partido RAIZ 2. Hunto nan ta forma 11 asiento cu segun Wever, ta suficiente pa tin un coalicion solido pa e proximo 4 anjanan. E otro partidonan cu tambe a haya asiento, no ta forma parti di e coalicion aki y si no logra cera algo cu nan, nan lo bay e ora den oposicion. Ta trata di partido AVP cu 7 asiento, MAS cu 2 y ACCION21