Dept di Cultura ta repasa bida di baluarte Ovito Tromp

ORANJESTAD – Manera cu NoticiaCla.com a raporta caba, conocido baluarte di deporte y cultura pa e.o. districto di Noord, Ovito Tromp a fayece riba dia 9 di februari 2015. Mientrastanto departamento di cultura Aruba a repasa e bida impresionante di Sr Tromp . Sr. Tromp ta un voluntario di curason y un persona cu masha dedicacion. Condecora den Ridder in de Orde van Oranje-Nassau na 2002. Sr. Ovito Benito Tromp a nace dia 29 di juli 1955 y ta biba na Calabas nr. 53 na Noord. Sr. Tromp a bira educador diploma na aña 1979 y for di e temp’ey tabata cu Scol Basico Santa Anna na Noord. Ultimo añanan El a traha den seccion curiculo na Departamento di Enseñansa.

Ariba tereno social cultural Sr. Tromp a duna aporte y sosten durante periodo di 1979 te cu ultimo, na diferente actividadnan social y deportivo na bienestar di e comunidad Arubano en general y pa loke ta trata districto di Noord en particular. El a dedica hopi tempo valioso di su tempo liber na proyecto- y otro programanan na bienestar di nos hubentud. Na aña 1979 el a drenta den e directiva di Centro di Bario Noord (CBN) y for di 1985, El a bira presidente. Bou di su liderato dinamico Centro di Bario Noord a pone hopi proyecto y a realisa nan.

Pa menciona algun di nan:

-           Renovacion di e dak di e edificio di Centro di Bario Noord (CBN);

-           Construccion di dos local destina pa crèche “Chikitin Bin Bin”;

-           E edificio di crèche “Chikitin Bin Bin” a resulta di ta chikito mirando e demanda cu tabatin pa kinderopvang na Noord y a amplia esaki den corto tempo despues bou liderato di Sr. Tromp;

-           Ovito tabatin tur cos di haci cu e BallPark nobo di Centro di Bario Noord, cu tur su facilidadnan correspondiente;

Entre tanto un di e veldnan mas popular di baseball y softball;

-           E proyecto di “Parke di Recreo Noord”, e hardin di hunga banda di e edificio di CBN;

Proyecto cu tabata semper e deseo di Sr. Ovito Tromp, apertura oficial tabata den aña 2002;

For di 1979 Sr. Tromp ta representante di Centro di Bario Noord (CBN) den e organisacion NGO cu yama “Asociacion Trabou di Hubentud Arubano”(ATHA).

Como dirigente di Deporte for di 1977, Sr. Tromp ta den directiva di Seccion Deporte di CBN y pa mas cu 20 aña e ta e persona di mantenimiento di Sportveld di CBN, entre tanto e ballpark nobo. Ultimo añanan tabata fungi como manager y entrenado di team 5-6. Alabes a fungi pa añanan largo como lider asistente y entrenado di promenan di e “Ekipo Toyota Little League” (9-12 aña) y durante di mas cu ocho aña pa e “Pee Wee Baseball Team” categoría B (7-8 aña) “CBN”.

Sr. Tromp tabata te na ultimo presidente di directiva di “North Indians Baseball Organisation”, un asociacion di baseball cu ta participa na e Campeonato Hubenil Nacional (16-18 aña) den “A” Klas y Dobel “AA”. Alaves a fungi te ultimo como dirigente di Liga Menor di Centro di Bario Noord. E mes tabata hungado activo di CBN – Vets Thunderbird Volleyball-team.

Departamento di Cultura Aruba conoce Sr. Ovito Tromp como presidente di CBN Ovito semper a percura pa tin actividadnan cultural den e programa di CBN. Tur aña tin e celebracion di dia di San Juan, Dera Gay cu ta concentra ariba e baile y principalmente nos mucha y hobennan. Tur aña tambe tin e plan vacacional durante vakantie grandi y semper ta pone debido atencion den e programa pa bishita museo y Parke Nacional Arikok.

Riba tereno cultural Sr. Tromp mes tambe tabata hopi activo y popular riba tereno aki. Ovito tabata miembro di e Coro di Misa “Coro Santa Anna” for di 1980 y como un tocado talentoso di mandolin tabata guia e Coro no solamente tur diadomingo of dianan santo, pero tambe riba dianan festivo, manera na inicio di e Status Aparte di Aruba riba 1 di januari 1986, na ocasion di e bishita Real na aña 1989 na “Imelda Hof”, na Noord; riba dianan nacional festivo y otro ocasionnan particular. Tambe na e carnaval di Noord Sr. Ovito tin su aporte.

Sr. Tromp tabata dirigente y musico di e grupo folklore “Tipico Noord” cu cua grupo e tabata mantene nos balor y tradicion cultural, durante henter aña y fin di aña, bishitando conocir- y amigonan pa desea nan e bon deseo di un cambio di aña, nos fiesta tradicional y tipico Arubano, nos “Dande”. Aruba ta perde un boluntario di curason cu amor grandi pa nos mucha, hobennan y nos grandinan pa e cultura ser promovi y conserva.