AZV: HAVA a trece panico innecesario den comunidad

ORANJESTAD – E asosacion di dokter di cas HAVA a trece panico inecesario den comunidad diahuebs mainta, bisando cu pa September como 15 mil pashent lo no tin dokter di cas pasobra tin 5 dokter cu ta bay debi cu tin problema financiero. Asina director di AZV Edwin Jacobs a bisa diahuebs merdia, reaccionando riba un comunicado mas prome cu noticiacla a saca como primicia. Segun Jacobs, e loke cu HAVA a trece no ta berdad, y sigur no den e forma con nan a trece dilanti cu 5 dokter di cas ta bay retira y cu 15 mil hende ta keda sin dokter. Esaki mientras cu AZV ta reglando tur dos caba. Segun Jacobs, e 5 dokternan ta bay pa otro motibo. Un of dos enberdad ta bay pasobra nan ta haya miho pago otro caminda, pero e otronan tin otro motibo pa cual nan ta bay. 

HOED Y MEDICO REEMPLASANTE

Segun Jacobs, entrante october tin un proceso cu ta cuminsa cu yama HOED (Huisartsen Onder Een Dak) y cu tin dokternan di Hulanda cu lo bin temporalmente pa substitui e dokternan cu ta bay. “Pues kico ta bo meta” Jacobs a manda puntra HAVA. Segun Jacobs, HAVA a haya ta bon pa conta tur e storia for di 2013 di tur e gastonan cu tabatin, siendo cu tin otronan cu tambe tin problema y no e dokternan so. Segun Jacobs, como grupo di interes ta nan derecho pa reclama den un pais democratico, defendiendo nan interes. Pero asina mes e loke nan a haci, no ta corecto segun e director.