Gobernador a huramenta 20 parlamentario awe mainta

ORANJESTAD – Awe mainta Gobernador di Aruba, su excelencia Alfonso Boekhoudt a huramenta 20 parlamentario (di cual 9 ta ‘nobo’) pa asina e constelacion di Parlamento #11 keda formalisa. E parlamentario #21 Benny Sevinger lo keda huramenta na un otro momento, debi cu e ta actualmente deteni den KIA. Como e persona di mas tempo den Parlamento, Mervin Wyatt Ras a fungi como presidente di Parlamento. Un total di 9 Parlamentario ‘nobo’ pues a keda huramenta awe tambe. Ta trata di Miguel Mansur, Marisol Lopez Tromp, Aquanette Gunn, Arthur Vallejo, Mike Eman, Gerlien Croes, Rycon Santos do Nacimento, Ursell Arends, y Geoffrey Wever. Entre nan, 6 ta realmente nobo ya cu nunca antes nan no a forma parti di Parlamento di Aruba. E otro 3 nan, den pasado a forma parti caba di Parlamento. E ceremonia completo a tuma apenas 20 minuut. Pa awe tardi, lo eligi e presidente y vice presidente temporal nobo di Parlamento.