Schwengle: Berdad a kibra regla di no huur, pa pone ambulance na Wayaka

ORANJESTAD – Falta di por a haya un edificio propio adecua na un sitio adecua, a pone cu gobierno mester a resorta na huur un localidad  pa ubica e post ‘nobo’ di ambulance. Minister di salud Alex Schwengle a admiti na NoticiaCla.com awe merdia cu enberdad gobierno a bisa cu no ta bay huur mas edificio. Sinembargo Schwengle ta bisa tambe cu e hecho cu a bisa cu no ta bay huur edificio mas, tabata mas bien un ‘richtlijn’ , y c no un ley (cu no ta bay huur mas). Como tal den e caso aki a purba di no huur, pero no por a haci otro. Y de hecho, e mandatario ta sigura cu ta pa un periodo 'corto' (di dos aña) y no pa semper. E post nobo lo ta ubica den e centro comercial Wayaka Falls na entrada di Wayaka residence na maart proximo. 

BLANCO DI CRITICA

For di momento cu a bira conoci cu e post di ambulance lo a wordo ubica den un centro comercial, pagando un huur mensual pa esaki, e la bira un blanco di critica. Critica, pasobra gobierno a sigura cu no ta bay huur edificio mas, den afan pa corta gasto. Segun Schwengle, lastimamente e edificio den cual e post di ambulance ta ubica aden, ta den un estado demasiado deplorabel. “Bo no por tene bo trahadonan eynan. E no ta safe pa nan”. Como tal a dicidi di ‘kibra e regla obligatoriamente’ pasobra mester ubica e ambulance den un lugar safe. Y ambulance ta un instrumento cardinal cu mester por funciona den un bon lugar pa salba bida.

PERIODO TEMPORAL 

Ademas, e mandatario ta sigura cu ta pa un periodo temporal, mientras cu ta buscando un solucion mas definitivo. “Mas bunita lo ta si ambulance por a keda den e edificio (actual) eynan mes y busca un begroting pa renoba esaki”. Esaki lo tabata perfecto pasobra e lugar ta uno ideal, serca di aeropuerto y cu accesibilidad facil na e trafico. “Ta buscando un otro solucion, mientras cu ta huur aworaki obligatorio”. E personal di ambulance mes tabata envolvi den busca un localidad nobo, y a inspecciona varios lugar nan mes. E localidad mester a pas cu nan. E mandatario di salud a sigura cu e personal a haya ‘medezeggenschap’ esta cu nan tabata por a bisa tambe unda pa bay, pues n ta algo cu e mandatario a dicidi.

ALOCA FONDO

E hecho cu ta huur un edificio awor, ta bin cu retonan tambe pa e mandatario ya cu mester a busca fondo den su presupuesto ya cu esaki no tabata presupuesta. “Ami mester bay coba den mi begroting, con mi ta bay balansa esey” Schwengle a bisa. E la sigura cu tin e fondonan ey, y e ta creativo sufiente pa e haya e fondonan necesario. “E huur aki no tabata den nos planning. E tabata un gasto extra, y tin cu wak con ta haci esaki sin trece otro servicio den problema. Tin un tiki ruimte” e mandatario a bisa, indicando cu e por maneha e situacion.