Cristian Soto a bira di tres candidato di ACCION21 cu ta retira den un siman

ORANJESTAD – Manera anticipa, diaranson merdia e di tres candidato di partido politico ACCION21 a entrega su retiro di e partido. Su retiro tabata na caminda for di un dia prome ora cu e la duna indicacion di esey. No mas cu e no a manda e carta. Pero  awor esaki a bira definitivo. Den su carta di retiro cu Soto a comparti riba su pagina di Facebook, e ta papia e.o. di liderazgo di division, poder extremo, ego y mas. Cosnan cu tambe ta wordo menciona segun otro dos candidatonan cu tambe a retira e siman aki. E ta informa den su carta tambe cu e retiro ta cu efecto inmediato. 

RETIRONAN PROME

Prome cu Soto, tabatin dos candidato cu a retira cu ta Daphne Lejuez y Leonardo Figaroa. Nan tambe a retira debi cu nan a sinti cu cos no tabata bayendo bon y cu e lider di e partido, sr Miguel Mansur tabata e problema principal. Y nan a retira na comienso di e siman aki. Den caso di Lejuez e situacion ta bira interesante ya cu si sr Mansur keda cla cu formacion di gobierno y eventualmente postula sum es como minister pa e partido, e siguiente persona na turno ta sra Lejuez pa haya asiento, no obstante cu el a retira (of expulsa den un otro possible scenario si esey lo a sosode) di e partido. Esaki pasobra segun ley, e lista cu ta valido ta esun cu a keda entrega na CSE, y cu a participa na e eleccion, segun vice presidente di CSE Hubert Maduro a splica den un entrevista awe ainda den e matutino BonDia Aruba. E persona ey, ta e prome cu tin cu resisti pa e siguiente riba e lista por haya e posicion. Den e caso aki tambe sra Lejuez no a saca su mes, pero si a logra 500 voto. No ta conoci si sra Lejuez lo acepta e asiento aki si e situacion yega na tal. Hecho ta cu e partido ta keda cu 3 miembro menos, pero mes momento sr Mansur a declara caba cu e retiro di e prome dosnan, cu e ta ‘alivia’. No sa si cu e di tres aki tambe e lo ta sinti mescos.