Atentado contra periodista de Vries a haya hopi atencion na Merca debi na caso Holloway

AMSTERDAM/ALABAMA – E atentado riba e periodista Hulandes  Peter R. de Vries diamars anochi (ora di Hulanda) a haya hopi atencion na Merca debi na su relacion cu mama di e desaparecido Natalee Holloway esta Beth Twitty. Tur medio Mericano cu a raporta e atentado, a duna atencion na e parti aki, haciendo mencion asina na Aruba mesora. Twitty y de Vries a traha hopi hunto den e caso di e desaparicion di Natalee na Aruba unda cu el a traha un programa na 2008 riba e caso. E programa ey mas di 7 miyon hende a wak, y pa esaki, de Vries a gana te hasta un premio Emy International. Twitty mesora a comunica cu e ta den shock pa e noticia aki y ta desea de Vries tur cos bon y forza. Holloway a desaparece na Aruba na mei di 2005 y a pone Aruba riba mapa internacional den un forma negativo pa hopi aña. Ainda e desaparicion ta un misterio y pa cual e supuesto culpable ta keto bay e Arubiano Joran vd Sloot cu ta cera den prison na Peru pa un caso di asesinato di un Peruana. E caso di de Vries ainda ta mescos unda cu e periodista ta bringando pa su bida.