Duda politico den construccion sala operacion nobo di hospital

ORANJESTAD – Tin duda serio den e construccion di hospital nobo pa Aruba, unda cu cierto partidonan politico (UPP y Democracia Real) ta cuestionando esaki seriamente. E prome tabata partido UPP cu su lider Booshi Wever, y awor tambe miembro di partido Democracia Real Alonso Tromp. Wever, cu ta ex minister di Salud e denuncia falta di transparencia cu planificacion di e sala di operacion nobo. Y Tromp ta sigui’e cu e mesun tipo di acusacion. Particularmente e forma con e architect escohi ta anda cu esaki y e costo extra cu ta monta na e parti aki.

ENCUENTRO CU MINISTER

Segun e partidonan, recientemente a tuma lugar un encuentro entre e minister encarga cu salubridad publico Alex Schwengle, Raad van Bestuur di hospital, representantenan di SOGA y e architecto Bermello, na unda e architecto a haci un presentacion di un diseño nobo pa e sala di operacion di hospital. “Nos a señala den pasado caba cu e forma con e architecto aki ta maniobra na Aruba, ta sumamente cuestionabel, pero pio ta e forma con e representantenan di SOGA y AIB a bin ta contribui na ehecucion di un proyecto unda desde su fase inicial tabata tin rumornan di corupcion y manipulacion di cifra” Wever a sigui bisa.

DISEÑO ROBEZ

Di parti di PDR, e otro partido cu ta cuestiona esaki, e architecto atrobe a logra di convence e minister y SOGA, pero cu e representantenan di hospital a keda decepciona pasobra e diseño no tabata cumpli cu e deseonan expresa den pasado door di esnan cu ta hasi uso di e sala di operacion. PDR no por compronde e forma di proceder di e mandatario ni di SOGA y ta exigi pa para e proceso aki di inmediato te ora cu e minister bin responsabilisa su maneho na Parlamento. Ambos partido ta sinti cu den un tempo na unda e pueblo ta sufri cu medidanan pa motibo di un mal maneho financiero ta inacceptabel pa acepta sin mas un aumento di mas di 5 miyon florin pa ehecucion di e sala di operacion. Lesa e keho di Wever (UPP) completo aki, y esun di Tromp aki.