Sindicatonan kier participacion activo ora negosha landspakket

ORANJESTAD – Den un carta dirigi na prome minister Evelyn Wever Croes diamars, sindicatonan SADA, SEPPA, SIMAR y SPA a pidi e mandatario pa por haya participacion activo sindical ora cu Aruba cuminsa negosha landspakket cu Hulanda proximamente. Segun e sindicatonan, specificamente e capitulo 9 cu ta trata Suspension y Retiro, y capitulo 10 cu ta trata reunion organiza di e LMA. Nan ta sinti cu ta pertinente pa ta presente pa evita problema despues. Ta trata di e temanan manera condicion di trabou primario, secundario y tercero. “Ta di esencial importancia pa ta informa na tempo di e temanan aki, y pa no wordo confronta na final cu decisionan cu por tin un impacto negativo riba e sector laboral. Den esaki a manda e carta  pa Prome Minister vociferando e preocupacion riba  e contenido di e Landspakket Aruba Uitvoeringsagenda 1 juli - 30 september 2021(Q3) relaciona cu e posicion huridico di e ambtenaar y gelijkgestelde.