Wever na informadornan: MEP kier partner cu ta ofrece stabilidad

ORANJESTAD – Partido MEP a informa informadornan diamars mainta cu nan ta buscando un partner(nan) stabil pa por goberna cu ne. Asina lider di partido MEP Evelyn Wever Croes a bisa na salida di su reunion di mas di un ora cu e dos informadornan Werleman y LaSorte. “Nos ta buscando un partner cu ta ofrece stabilidad” Wever Croes a subraya. Mirando e resultado, partido MEP no por goberna su so aunke cu esey tabata e deseo. Pues mester di partnernan acerca. Y for di e ultimo desaroyonan di e partidonan chikito, Wever a bisa di ta confirma nan pensamento riba e cierto partidonan aki. 

KICO KIER LOGRA

Segun Wever, nan punto di salida awor ta pa traha riba recuperacion di pais Aruba como isla, economicamente, crea mas cupo di trabou bek pa esnan cu a perde esaki durante pandemia, y tambe recuperacion di e ser humano cu lo a haya problema di salud, mental a causa di e pandemia. Y finalmente, atende e landspakket cu Hulanda den un forma responsabel pa e isla por sigui conta cu sosten financiero di Hulanda. 

PARTNERNAN

E lider di partido geel a recorda su experiencia cu partnernan den e ultimo coalicion unda cu segun e, e turbulencia ultimo a ‘afecta nos partido mahos’. A sigui e desaroyo den por lo menos dos partido chikito, cu ta ACCION21 y MAS y ta preocupa pa e situacion ey pero ta laga nan resolve esaki internamente. E problema ta cu ora cu bo ta cu nan, e ta afecta e gobierno tambe.