Den partido politico MAS tin problema interno debi na confiansa

ORANJESTAD – Despues di e problemanan raporta den partido ACCION21 dialuna anochi, tin problema tambe den partido politico MAS. Specificamente entre dos candidato pa motibo di number. Candidato #2 di e partido sra Aquannette Gunn a habri afo contra colega candidato # 4 esta sra Solangel Lacle. Segun Gunn, Lacle kier su posicion basa riba un protocol cu a keda firma pero awor cos a cambia y Gunn no kier tende di protocol mas. 

CANTIDAD DI VOTO

Den eleccion sra sGunn a ricibi 77 voto mientras cu sra Lacle a logra 189. Y segun un protocol cu e candidatonan a firma dia 6 di mei ultimo, esun cu tin mas voto, ta representa e partido. Den e caso aki pues, sra Lacle tin cu bay prome. Pero cos a cambia. “Na e momentonan aki, ami Aquannette A. Gunn a dicidi di reacciona relaciona cu tur loke ta bayendo rond riba medionan social. Na prome luga mi kier enfatisa cu segun e Ordenansa Electoral ami a keda apunta pa forma parti di e 21 parlamentarionan di pais Aruba pa e siguiente 4 aña” sra sGunn ta cuminsa bisa den un comunicado.

PROTOCOL

Y sra Gunn ta confirma cu el a firma un protocol. “Ta berdad cu cada candidato a firma un protocol, cual tabata un palabracion interno y ta basa riba confiansa” sra Gunn ta bisa. Pero aki cos ta cambia. “: Mi persona no ta confia sra. Solangel Lacle debi na su comportacion insano durante henter e campaña cu a laga un sabor amargo y di desconfiansa cerca mi persona. Ademas el a uza e protocol como tool di campaña contra di su mesun coleganan door di pidi hendenan vota p'e y no pa su coleganan”

SIGUI PALABRA

Segun sra Gunn, Sra. Solangel Laclé no tabata sigui palabracionnan haci durante reunionnan di partido, mucho menos e tabata respeta nan. “Tambe el a practica canibalismo. Pues e tabata pidi mi famia y amistad na un forma insistente y persistente pa vota pa su persona enbes di mi. Esaki pa mi ta muestra di falta di etica y falta di colegialidad y pa mi el a demostra di ta un persona inconfiabel. Si durante henter campaña el a sa di viola palabracionnan haci, ki garantia partido MAS por tin den integridad y honestidad di un persona asina” sra Gunn ta finalisa bisando.