108 studiante di Aruba a participa na anochi di informacion riba seguro

DEN HAAG –Un grupo grandi di 108 studiante a atende e prome anochi di informacion na Haagse Hogeschool, organisa pa Gabinete di Minister Plenipotenciario di Aruba . E programa a consisti di dos parti: informacion tocante e seguro nobo y cambionan pa loke ta guia di studiantenan door di e mentornan. Wilke van Driel di e compania InsureToStudy a tene un presentacion den cual a splica detayadamente loke e pakete di seguro ta encera pa e studiantenan Arubiano cu un Arubalening. Van Driel a bisa cu banda cu e seguro ta cubri gastonan medico, manera dokter di cas, specialista, dientista y remedi, e pakete ta hopi mas amplio.

KICO TA CUBRI

Dos caso nobo cu InsureToStudy ta cubri -compara cu e seguro anterior- ta cu e studiante tin un compensacion pa un bril di 500 euro pa aña. Tambe e seguro ta cubri calamidad. Bou di esaki por compronde ora un familiar di e studiante yega na fayece, e seguro ta zorg pa e studiante por bai Aruba mas pronto posibel. Esaki ta conta solamente pa un familiar den prome grado cu ta mayornan y rumannan y tambe familiar den di dos grado, cu ta wela y welo. Van Driel a segura e studiantenan cu kico cu pasa, nan ta segura y InsureToStudy ta disponibel pa clarifica cualkier duda cu e studiante por encontra cerca un dokter of hospital. Durante y despues di e presentacion tabata tin espacio amplio pa e studiante por a haci nan preguntanan, loke a sosode tambe. Nan a ricibi un contesta amplio ariba nan pregunta.

CAMBIONAN

Director interino di Gabinete di Aruba Shandra John a splica e cambionan tocante guia di studiantenan door di mentornan. Desde prome di februari e mentornan ta guia unicamente e studiantenan den nan prome aña. Tur studiante cu tin mas aña studiando ta cai directamente bou di departamento di enseñansa di Gabinete di Aruba. Sra. John a splica cu esaki ta significa entre otro cu e studiantenan aki lo mester entrega nan resultado di estudio directamente na Gabinete di Aruba. Studiantenan cu tin otro pregunta of ta confronta otro problemanan por acudi na e depar-tamento di Cuido Social of e departamento huridico di Gabinete di Aruba.

 PREGUNTANAN

Na final di e programa tabata tin tur tempo pa e studiantenan por a papia y puntra informacion adicional na e representantenan di InsureToStudy y funcionarionan di Gabinete di Aruba. E studiantenan a laga sa cu e encuentro y e informacion duna tabata hopi bon y cu tur nan preguntanan a keda contesta. ‘Esaki ta netamente nos meta como Gabinete di Aruba pa tene e encuentronan aki. E studiante ta haya e chens pa lansa nan preguntanan of trece dilanti cualkier incertidumbre cu nan por tin. Nos meta ta pa nan ta lo mihor informa cu ta posibel pa asina nan cual ta conduci pa nan por concentra mihor ariba nan estudio,’ asina Shandra John a añadi na e prome anochi di informacion. E siguiente encuentro di informacion pa studiantenan lo ta diahuebs 12 di februari na Enschede.