Elmar: Varios ‘storing’ a pone cu ‘atrobe’ varios barrio tabata sin coriente diadomingo atardi

ORANJESTAD – Un storing, pero e biaha aki di Elmar, a pone cu un biaha mas varios barrio tabata sin coriente diadomingo atardi. Segun e version oficial di Elmar, ta bisa cu mas tempran a surgi un storing den area di Cumana, Paradera, Babijn, Rooi Bosal y vecindario. “ Motibo di storing ta un kabel di tension halto” e comunicado ta bisa. “ Nos tecniconan a traha riba esaki pa por a suministra coriente pero lamentablemente e kabel no a wanta y consequentemente suministro di coriente a wordo interumpi” a sigjui bisa. “Nos tecniconan ta trahando riba e storing aki y lo haci nan maximo esfuerso pa suministra coriente lo mas pronto posibel” y mescos cu WEB, na final a ofrece e disculpa.”  Nos disculpa pa e inconveniencia”.

KEHO

Mientras cu e biaha aki e problema tabata di Elmar, e ciudadanonan no a importa di unda e problema tabata, sino cu simplemente atrobe, nan ta wordo perhudica cu e problema di coriente. Esaki mientras cu un simple disculpa tabata bin di e compania en cuestion. Un disculpa cu segun e usuarionan, no ta suficiente, ya cu pa fin di luna, ta cobra e suma completo si di coriente, siendo cu no a haya esaki den practica.