Divi Aruba beach Tennis tournament nombra e evento di aña 2014 pa ITF

ORANJESTAD - E organisacion di Beach Tennis na Aruba a ricibi e grato noticia cu pa di 3 aña consecutivo e evento organisa na Aruba durante e luna di November ta wordo nombra e evento di aña den tur e evento nan organisa pa ITF durante 2014 durante e Oscar Beach Tennis cu ta wordo teni na Italia. E competencia di mas grandi di Aruba ta e evento organisa na Cervia na Italia cual a gana e titulo akin a 2010 y 2011 pero desde 2012 ta pertenece na Aruba.

Un evento grandi pa cual no tin palabra pa splica kico esaki nifica pa Aruba den e deporte aki. E dia despues di e evento tur hende por nota comentarionan riba red nan social manera FB caminda e hungadornan ya ta hasi count down pa por ta bek e proximo aña. Loke ta hasi e evento na Aruba algo unico, no ta solamente e premio cu no por wordo iguala na ningun otro pais of evento, sino e fiesta cu tin banda di e torneo. Cada persona no unicamente ta bin pa participa y bai cu premio pero tambe ta hasi uso di e evento aki pa por ta den e fiesta di Beach Tennis di mas grandi na mundo.

Remarcabel den 2014 tabata e participacion en grandi di diferente pais cu a participa. Nos ta referi na un total di 23 diferente pais: Venezuela, Chile, Russia, Puerto Rico, Brazil, Italia, Hulanda y asina aki nos por sigui menciona. Y por menciona cu ta basta caba a confirma nan participacion pa e aña aki. Otro punto remarcabel ta cu mayoria e biaha aki a bin mas trempan y a tuma e tempo pa conoce nos isla un tiki mas cual ta aporta hopi na nos turismo.

Durante e Oscar Beach Tennis Award no ta unicamente ta saca e evento di aña sino tambe ta premia e hungadornan cu mas a destaca durante 2014. Pa por menciona algun: Best Player Men – Marco Garavini kende no ta un desconoci na Aruba. E premio aki tabata pertenece na Calbucci pa e ultimo 3 aña nan. Best Player Women a bai pa Federica Bacchetta. Den e ramo aki si por a note diferente ganadora den e ultimo aña nan. Na 2013 e representante di Brazil Cortez a gana e titulo aki.

Nos kier invita un y tur pa pasa try out e deporte aki na Tropicana Beach Tennis Club situa net banda di Tropicana Hotel. Pa mas informacion tambe por bishita e website www.beachtennisaruba.com