WEB: Fayo di carchi di control pa Boiler #3 por ta causa di e blackout di diasabra

BALASHI – E posible motibo di e ultimo blackout di diasabra na Aruba cu a dura casi 12 ora (pa tur hende por a haya coriente bek), por ta fayo di un carchi di control of un asina yama control board di e processor di Boiler #3. Pero investigacion tin cu determina esaki cu certesa. Asina director di WEB Aruba NV Luis Oduber a bisa durante un conferencia di prensa diadomingo atardi. Ademas, el a ofrece e disculpa di custumber pa e inconveniencia cu pueblo a sufri a consecuencia di e apagon aki. Mientras cu no tin reembolso financiero economico pa e sla cu comercio a sufri, por ‘claim’ na Elmar si tin ekiponan cu eventualmente por a daña, Oduber a sigui bisa. 

E MOTIBO

Un splicacion amplio technico a wordo duna pa sr Oduber na inicio di e conferencia, di kico a pasa den forma cronologicamente for di momento di e prome nota di problema inicial cu tabata pa 3:10pm diasabra atardi, te na e momento cu tur cos a keda resolvi mas di 12 ora despues, esta 5:15am awe mainta. Esey ta  ora cu henter Aruba a haya coriente bek. Realidad ta cu for di 10’or di diasabra anochi, e prome casnan ya cuminsa ricibi coriente bek. Despues tabata den careda di 4’or y mei awe mainta cu mayoria di hende a haya nan coriente y pa 5:15pm, Aruba completo tabata conecta, segun sr Oduber. Tin casnan cu ainda 6’or sinembargo no tabatin coriente.  Pero pa loke ta e blackout total, esaki oficialmente a dura algo mas cu 11 ora.  

POSIBEL

Segun Oduber, e problema principal ta cu nos ta riba un isla, unda cu e capacidad ta ‘limita’ den sentido cu no tin espacio pa mas planta di coriente cu por ‘pick up’ e sla si tin un blackout asina di un 'otro planta' manera den paisnan grandi. Como tal, un blackout na Arubapor sigui surgi, aunke cu tin ekiponan sofistica. E diferencia ta cu e cantidad di tempo cu ta tuma pa reestablece coriente, lo dura mucho mas cortico y por isola e problema mucho mas lihe pa evita mas daño. A recorda cu e pior apagon (blackout) di Aruba tabata na 2002 ora cu tabatin 24 ora cu Aruba a keda sin coriente, y algun siman despues cu tabatin varios brown out ainda (un apagon parcial) unda cu no Aruba completo tabata sin coriente. Esaki no por sosode mas na Aruba debi na e inversion di ekiponan mas moderno. A splica cu debi na e pandemia, no por a trece techniconan di afo pa finalisa e proyecto cu tin cu percura pa un situacion asina di apagon por wordo limita y posiblemente evita. Ta premira cu pa augustus awor, esaki por cambia y cu ayudo di e techniconan aki, por finalisa e proyecto y pone operacional na Aruba. 

DISPENSA SO

Hopi tabata keha cu WEB ta ‘get off’ mucho liher ora di un apagon asina, cu un simple ‘dispensa’ y ta sigui, sin cu cabez ta cay. Den e caso aki, sr Oduber a splica cu ora cu ta trata di un problema technico asina, ta dificil pa blame un persona of departamento specifico, pasobra no ta trata di eror humano den e caso aki. Pues no por culpa of laga cabez di un persona cay den un situacion asina. Segun sr Oduber, e situacion ta suficiente stabil cu Aruba no tin cu preocupa pa un ripiticion den e dianan nos dilanti.