Aruba a experencia blackout total diasabra atardi laat

ORANJESTAD – For di 6’or y mei di atardi, Aruba total a experencia un blackout, y varios caminda sin awa tambe, sin cu tin informacion ki ora esaki ta keda resolvi. Asina e vocero di e planta di awa y coriente WEB, Asja Dongen a confirma un rato despues di e blackout. “A sosode fayonan di nobo cual a conduci na un total BLACK OUT riba nos isla” Dongen a raporta, un ora despues cu e prome fayo tabata den recuperacion. For di 5’or varios parti di Aruba a cuminsa experencia problema cu coriente. 

E PROME BOLETIN

E prome boletin di WEB a bin algo despues di 5’or diasabra atardi. “Actualmente tin interupcion di coriente den diferente bario, causa pa un fayo den planta di coriente na WEB. Ta bezig ta averigua e causa y na e momento aki no por bisa ainda cuanto lo dura pa recupera suministro di coriente. Asina cu tin mas informacion lo duna update via nos medionan social. Sea sigura cu nos tecniconan ta haci lo maximo pa limita e duracion di interupcion di coriente. Nos disculpa pa e inconveniencia” e mensahe a bisa.  E areanan afecta pa e interupcion di coriente causa pa un fayo den planta di coriente di WEB tabata e ora ey ainda solamente  Oranjestad, Tanki Leendert y Sabana Blanco.

RECUPERACION

Despues di mas of menos 45 minuut, WEB a informa cu nan a logra identifica e problema. “ A logra identifica y isola e fayo y a cuminsa e proceso di recuperacion. Ta calcula cu lo dura mas o menos 1 ora pa recupera suministro di coriente den e diferente barionan.                                                                                

BLACKOUT

Pero e solucion no a dura largo. Casi un ora despues, cos a bira pio y Aruba a bay den un blackout total. E ora e mensahe mas pio a yega:” A sosode fayonan di nobo cual a conduci na un total BLACK OUT riba nos isla. No ta conoci cuanto lo dura pa recupera. Ta pone tur prioridad pa soluciona e fayo y interupcion. Keda pendiente” e mensahe a bisa. Y te awor, no ta conoci con largo lo dura prome cu e situacion drecha.