Dowers: Lo bende vehiculo tuma den beslag si no busca nan

ORANJESTAD - Doñonan di vehiculo tuma den beslag tin chens cu nan por perde esaki pa semper. Esaki minister di Husticia Arthur Dowers a declara despues di a bishita e garashi di polis na Balashi. "Nos a papia hopi, a scucha hopi y a duna hopi tempo. Awo ta ora di accion. Si otro siman no busca bo vehiculo, e ta bay", a Dowers a duna di conoce. E ta referi na e autonan staciona na tur e Wardanan di Polis pero specialmente na e garashi di Polis situa na Balashi.

Den pasado na mas di un ocasion a yega di haci un yamada pa publico busca nan vehiculonan pero sin mucho reaccion. Esaki ta auto y brommernan tuma den beslag dor cu falta paga number di auto, seguro, keuring of otro infraccion nan mas. Pero mester tene cuenta cu ta cobra un multa pa cada dia cu e auto ta eyden. Pues si e keda mucho largo, no ta ni bale la pena mas.

Polis lo haci un esfuerso pa haci e cura limpi, den cual lo saca tur e vehiculonan aki, sea ta pa bende nan of pa destrui esunnan cu no ta sirbi mas. Ta haci un apelacion riba publico pa duna importancia na e yamada aki, pasobra ley ta duna Gobierno e poder pa bende of destrui e propiedad despues di algun siman cu e ta den beslag. "Kisas e doño di e vehiculo mes no tin interes, kisas e auto ta mas caro awo cu e multa. Kico cu por ta e motibo, sea ta busca e vehiculo of sino ta bende of destrui'e", Dowers a conclui bisando.