Gradus: Campaña electoral no por ta excusa pakico no tin presupuesto ainda

ORANJESTAD – E Colegio di Supervision Financiero di Aruba CAft no tabata nada contento cu Aruba ainda no a aproba su presupuesto di 2021. Y e presidente di e colegio Raymond Gradus a sigura noticiacla cu e pandemia y awor e campaña electoral ‘no por ta un excuse pa no tine cla’. Esaki a base di pregunta di e portal aki si no a tende cuenta cu tabatin un campaña electoral y un pandemia y cu esey por ta motibonan valido pa cual gobierno lo no ta cla ainda cu e presupuesto. Sr Gradus tabata hopi pertinente bisando cu no ta pasobra tabatin un eleccion y awor un gobierno demisionario, cu e presupuesto no ta cla. Segun Gradus, ta algo incomprendibel. E ta spera tambe cu e presupuesto di 2022 lo keda entrega na tempo e biaha aki, esta pa 1 di September 2021. “E ta un ley. Simple. Y tin cu cumpli cu ne!” Gradus a bisa pertinentemente. Mientrastanto minister di Finansa Xiomara Maduro a sigura e portal aki recientemente cu e presupuesto ta na Parlamento y cu asina cu e parlamento nobo sinta, cu e presupuesto lo mester wordo pasa. 

E PRESUPUESTO

E proyecto di presupuesto di 2021, tocante cual CAft a duna conseho na januari, a conoce den e sector colectivo un deficit di casi 24% di e Producto Interno Bruto (PIB). CAft a haci diferente recomendacion pa reduci e deficit ey. CAft ta lamenta pues cu ainda Parlamento no a trata e proyecto di presupuesto y ta enfatisa importancia di un proceso presupuestario ordena. Ahustacion di e proyecto di presupuesto ta necesario aworaki, pa motibo di e efectonan positivo di un recuperacion di turismo mas rapido cu loke a premira. Tambe a pidi Aruba pa bolbe revisa e gastonan den presupuesto na un manera critico. Cu miras riba e retraso di e cuenta anual di 2019 y e repercusion di esey den e cuenta anual di 2020, CAft ta enfatisa un biaha mas importancia di completa e ciclo presupuestario y di hustificacion na tempo tambe.

GOBIERNO DEMISIONARIO

Riba otro pregunta di e portal aki, cu si dura pa por forma gobierno, con por spera cu e gobierno demisionario por hinca un presupuesto den otro na tempo pa september 2021, y si de facto un gobierno demisionario tin e autoridad pa haci tal. Den pasado ora cu tabatin formacion di gobierno, a opta pa laga un gobierno nobo sinta pa asina nan determina kico ta bira e prioridad pa traha un presupuesto. Pero segun sr Gradus, e hecho cu e gobierno ta demisionario, no mester stroba nan di tin un presupuesto aproba pa 2022, y entrega na tempo e biaha aki, esta 1 di september di e aña aki.