Contrato entre AZV y ANSA firma

ORANJESTAD - AZV y ANSA (Air Navigation Services Aruba) a firma un contrato di servicio cu otro dialuna ultimo, 9 di februari. Manera ta conoci, AZV ta administra e ley di AZV (seguro medico basico) y tambe e seguro medico adicional di Pais Aruba (seguro medico adicional cual ta un benificio di e dunado di trabou –den e caso aki Pais Aruba- pa su empleadonan). E firmamento di contrato entre AZV y ANSA ta nifica cu AZV ta bay administra e seguro medico adicional pa e empleadonan trahando na ANSA. E gastonan di e seguro adicional lo cay pa cuenta y riesgo di ANSA. E contrato a wordo firma pa 1 aña y cu e posibilidad pa prolongacion di 1 aña cada biaha. Riba potret ta mira di parti di ANSA, señor N. Kock, director, y señor O. Clark, manager recurso humano. Di parti di AZV tabata presente, señor drs. Anco Ringeling, director, señora Suzanne van Spall, hurista, y señora Glenda Cardoze, hefe di departamento di administracion di polisa.