Ministerio Publico lo coopera pa laga Benny Sevinger huramenta

ORANJESTAD – Otro siman lo tin un situacion unico na Aruba unda cu un persona cu ta deteni den KIA, lo keda huramenta como parlamentario di Aruba. Ta trata aki, manera ta conoci, di e parlamentario Benny Sevinger di partido AVP. Y e portal aki a confirma via abogado di sr Sevinger, esta mr David Kock cu Ministerio Publico a informa caba cu nan lo coopera cu e situacion. 

SALI TEMPORALMENTE FOR DI KIA

Esey ta nifica cu lo permiti sr Sevinger sali for di KIA un rato pa huramenta, y despues e tin cu bolbe KIA te ora cu Ministerio Publico dicidi cu e por recobra su libertad temporal manera cu a hasi cu e otronan den e caso Avestruz. Segun e abogado, esaki ta debi cu pa ora cu e huramentacion tuma lugar, ainda su cliente lo ta deteni den KIA. Y como tal mester haci provisionan pa por logra cu toch e por huramenta. 

DETENI 

Manera ta conoci, sr Sevinger siendo den KIA, unda cu e ta sospechoso principal pa e caso Avestruz, a participa activamente como un candidato riba lista di partido AVP. Y aki el a logra haya suficiente voto personal pa saca su mes, esta cu e tin derecho di un asiento. Esey ta nifica cu den e caso aki, e ta haya un di e 7 asientonan cu AVP tin derecho riba dje aunke cu e tabata number 29 riba e lista, y sr Robert Candelaria cu tabata number 7, ta keda afo.