Un di e avionnan di Hurricane Hunters a yega Aruba pa vigila tormenta Elsa den Caribe

ORANJESTAD – Manera anuncia, diahuebs atardi un di e avionnan  di e asina yama 53rd Weather Reconnaissance Squadron, miho conoci como Hurricane Hunters a yega Aruba y lo usa nos isla como base pa nan operacion e fin di siman aki. Manera ta conoci, tormenta tropical Elsa a nace awe marduga y nan a yega pa monitoria e tormenta aki. E tormenta mes ta programa pa paa 400 km panort di Aruba diasabra mainta. 

Manera indica caba, e squadron aki, di Air Force Reserve Mericano ta unico. E unico organisacion di Departamento di Defensa Mericano cu ainda ta bula den tormentanan tropical y horcan desde 1944. Esun cu a yega Aruba awe, ta un di e 10 avionan tipo Lockheed-Martin WC-130J y ta parti di e base na  Keesler Air Force Base na Biloxi, Mississippi. Pero durante temporada di Horcan nan ta basa na Miami. 

E avion y personal ta ekipa pa bula den e tormenta y haci tur midi necesario di e tormenta aki. Nan lo ta bulando den e tormenta tanto diabierna como diasabra y bula bek pa Miami diadomingo. Un buelo den e avion por ta hopi turbulento, pero tanto e personal como e avion por wanta esaki, y nan ta experto den maniobra den e tempo aki.  Potret Cortesia 297 Spotters