Docentenan di Colegio Arubano a exigi retiro di directiva per direct

ORANJESTAD – Un grupo di 91 docente di Colegio Arubano a protesta un rato diahuebs mainta pafo, exigiendo retiro di e directiva completo di SVOA ‘per direct’. Esaki pasobra nan no ta haya cu e directiva ta competente pa maneha e scol. Den un carta repasando un serie di punto, e presidente di e asosacion di docente, Sr Everick Rincones a mustra pakico no kier e directiva presidi pa Ernesto Rosenstand mas. Pa sorpresa di e docentenan, e directiva rechasa e carta y ignora e grito di e docentenan, segun Rincones. Atardi 3’or e grupo a keda di entrega un carta adapta na prome minister Evelyn Wever Croes. 

KEHO

Entre e kehonan tin e forma con e directiva ta dirigi tur cos. E no ta transparente, no ta reuni cu e docentenan y ta implementa decisionan di forma unilateral. Tambe e directiva no ta atendiendo cu e statuut y varios docentenan nan situacion huridico no ta sigura pa e aña escolar. Ademas no ta trahando jaarrekeningen, cu ta pone cu sin esaki no por haya possible subsidio di gobierno tampoco. Y asina tin un serie di puntonan mas cu e docentenan ta protesta ariba, conduciendo na un exigencia di retiro inmediato di e directiva completo. Di otro banda e docentenan no a informa kico nan siguiente paso ta, si en caso e directiva no retira. Aparentemente e directiva lo a bisa caba cu nan no por wordo retira y cu SIMAR y e docentenan no por retira nan.