DNM: Tristo cu naturalesa y nos medio ambiente a sufri dañonan pa e oil spil

ORANJESTAD – Control y limpiesa ta continua riba e oil spill di WEB di dialuna ultimo. Limpiesa bou di auspicio di Directie Natuur en Milieu (DNM) como departamento encarga cu maneho di naturalesa y medio ambiente, y e fraccion di partido MEP a bay controla e situacion pa nan mes. Pa DNM, nan ta bisa cu ta tristo pa menciona cu naturalesa y nos medio ambiente a sufri dañonan a causa di e oilspil y por a nota cu a haya por ehempel parhanan, piscanan y panicrack morto na e costanan di rif. Areanan di mangelnan tambe a haya daño di e zeta.

PROME YAMA

Nan tawata un di e promenan yama ariba dialuna pa forma parti di e team pa duna conseho riba e proceso di cleanup cu mester tuma lugar despues cu a surgi e oilspil na WEB NV. Manera cu nan a raporta inicialmente, WEB Aruba a contrata 3 compania pa cuminsa cu e cleanup di cual companianan a uza booms, sausage booms pa contene y absorba e azeta y detergente. Diferente departamentonan manera Bureau Rampenbestrijding, Kustwacht, Maritiem Politie, Directie Scheepvaart, Utitilties, WEB NV, Bureau di Minister encarga cu Medio Ambiente y DNM a bini hunto pa forma un team completo pa duna conseho riba diferente aspectonan den e sucedido aki. Directie Natuur en Milieu su rol den e proceso aki ta pa haci sondeo di e area afecta, sigui monitorea e proceso di haci limpi institui door di WEB y asina duna su conseho na Bureau di Minister di Medio Ambiente ariba e sucedido.

PRODUCTONAN USA

Algun aña pasa diferente productonan a haya aprobacion door di departamento di DNM cu por uza pa haci limpi den caso di un oilspil. Ta importante pa menciona cu den e caso aki di e oilspil na WEB, e productonan cu aprobacion di DNM ya ta den uzo desde dialuna pa e companianan contrata door di WEB y asina tambe nan a logra contene e spil pa e no plama bai mas leu.

SURVEILLANCE

DNM lo sigui como parti di e surveillance team cu a bini hunto pa haci sondeonan y monitorea e area. Nan a informa cu asina cu nan tin informacionnan mas concreto nos lo informa adecuadamente.

FRACCION MEP

E fraccion di MEP tambe a bay tira un bista y a post algun potret riba nan pagina di Facebook. “Awe nos fraccion a bin wak e daño cu e oil spil a haci na nos naturaleza. Loke hopi ta lubida ta cu nos unico pilar economico ta turismo y e daño haci na nos naturaleza ta irreparable. Kende ta responsabel awor?” e fraccion ta puntra. Nan a critica e presidente di Aruba Bird Life Conservation Greg Peterson, cu lo a bisa cu ta solamente 3 parha a muri.Mas despues, lider di fraccion di MEP Evelyn Wever a duna e siguiente reaccion na NoticiaCla.com riba e suseso. "Nos fraccion ta lamenta cu hendfenan ta downplay e desastre aki. No ta bai si 3 parha a muri of mas parha of menos parha. Ta bai cu e desastre ta uno grandi, y ainda nos no sa con grandi e ta. Nos a papia cu hendenan den e field y nos a mira cu nos propio wowonan. Mi no ta sintimi yama pa discuti si ta 3 pf 4 parha a muri, locual mi ta lamenta ta cu en bes cu nos uni forsa y combati e desastre aki, esnan encarga ta downplay e problema.". Segun Wever, e ta bisa cu e no sa kiko precies sr Peterson a mira. "Pero locual ami a mira awe, pasando na e diferente rifnan, mi por conclui cu e desastre aki ta mucho mas grandi cu nos a pensa ora nos a scucha e reaccionnan di esnan encarga".

GREG PETERSON

Como reaccion  awe tardi, presidente di Aruba Bird Life Conservation, Greg Peterson a sigura NoticiaCla.com cu ta 2 parha so a wordo haya, contamina cu e zeta derama. "Tres otro a wordo detecta cu zeta, pero  nan no por a wordo captura. Nan por a bula ainda" Peterson a sigui bisa. For di ningun instancia, Peterson ta bisa, di a haya informacion di mas parha. E ta mustra cu tin basta cu ta bezig, y cu si tabata asina, e lo ta prome cu nan lo a avisa. "Si cualkier hende sa di parha contamina, otro di e dosnan menciona, nan mester raporta esaki mesora serca polis maritimo. Nan, na nan turno lo purba captura esaki" Peterson a bisa.  NOTA: Fotonan ta di e pagina di facebook di parlamentarionan di partido MEP y verifica pa nan autenticidad.