ARA: Gobierno no por uza pandemia como excusa pa no entrega cuenta annual

ORANJESTAD – Gobierno no por usa e pandemia como excusa pa no produci cuentanan annual pa Controleria General di Aruba (ARA). Asina e presidente Frederick Nuboer a bisa despues di su bishita na Gobernador Alfonso Boekhoudt. ARA ta parti di e ronda di consulta den cuadro di formacion di gobierno cu a cuminsa for di diasabra ultimo. Aki ta unda cu Nuboer a resalta e hecho cu gobierno no a presenta e cuentanan annual ainda di 2019 ni 2020 y ta usando pandemia como excusa. Pa ley 1 di juni di e aña aki, gobierno mester a presenta e cuenta annual di 2020, pero no a sosode. 

IMPORTANTE

Segun Nuboer, ta importante pa gobierno duna e ehempel na comunidad, mescos cu ta exigi di tur compania local pa tin nan cuentanan na ordo. Cu e hecho cu no tin un cuenta annual aproba, e ta stanca e proceso di control, y esaki ta refleha malo riba gobierno di Aruba. Gobierno mester cumpli cu su palabracionan y esaki ta importante sigur awor cu tin un acuerdo cu Hulanda riba e aspecto financiero. Si un pais no cumpli cu esaki, e ta mustra malo pa e pais y ta indica cu e ta opera ‘bou nivel’. A mustra cu pa e proximo 4 aña mester bay traha duro pa actualisa tur cos, entrena hende pa haci esaki, y sigura cu e cuentanan ta keda entrega na tempo pa asina por controla esaki. 

FASE

Dentro di poco, lo tin un rapport di ARA cu lo sali, cu nan evaluacion di e prome aña di pago di FASE. Den e rapport lo ‘toets’ kico a bay bon y kico a bay malo  y si tin cosnan malo, esnan responsabel, lo mester carga consecuencia pa esaki.